{column 39a2}Conæmdetar sruithe Érenn a ríaglaib na screptræ pennatóir dílgind frepthæ cech pechtæ ó biuc co m-mór. Air ro suidigthe na h-ocht n-airig súalach cona fodlaib fri hícc & slánugud na n-ocht n-airech n-dúalchæ co neoch gainedar úaidib.
Mesrugad co n-ainmneit fri craos & mesci. Congbaideta co n-genus fri sártoil & adaltras. Easlabrai co cartóit fri saint & cáindúthracht cride fri format & misci. Cennsa co n-áilgeni fri ferc & debthaige. Fáilte spirdalta fri dogailse n-domanda.
It é dano nomina na n-erech n-dúalachæ indso tríasmbí bás cuirp & anma cech duine .i. cróes & étrad & rl.
It é indso anmann na fodladh genither ó chræs .i. fáilte nemmeasraigthe, ilar comlabrai, {column 39b1} báes cédluda, daoscaire imráiti, inglaine menman, dercháinedh, deogh cen commus, meisci cen frithgabáil.
It é immorro fodlai genethar ó ainmnit .i. fáilte spiraltaide, sochraide cuirp, glaine anmæ, tó co toiscide, cétfaide ecnai, immed n-indtliuchta, saigid for rúna Dé.
It é andso freptha in craóis .i. áine mesraigthe, congain cride, úaite séire, mence cestaigthe, frithaire, fled do bochtaib, dídnad cech goirt, timargna fri óen-trátha, cummessair saingnústæ, ainmne fri cech rét cor imráiter.