Corpus of Electronic Texts Edition
Regula Mucuta Raithni (Author: Unknown)
poem 6
Do fedmannaib anmcarat gebes mancho so.
- 257] Dia mbat an[a]mchara neich
258] a anmain nísroirr,
259] ní[ra]b dall ic tu[u]s daill,
260] nísreilce hi foill.
- 261] Tabrait dait a coibsena
262] co diúit is co léir,
263] ní ragba a n-almsana
264] meni bet dot réir.
- 265] Cia gaba a n-edparta,
266] níp mór lat a sercc,
267] mar bad teine beth fort churp
268] nosfodla tria[t] nert.
- 269] Do áine, do aurnaichti
270] rohícca al-lúag,
271] mani derna attetha
272] cinaid inna slúag.
- 273] Tinchosc inna n-aneólach
274] sléchtaidi fot réir,
275] ar ná dichset hic cinaid
276] hit degaid fodéin.
- 277] For na seotu nírb fot cuacc,
278] la dóenib níp neóit,
279] dáig is diliu dait th'anim
280] indaite na seóit.
- 281] Dosbera do óegedaib,
282] cid trén nó cid trúag,
283] dosbera do bochtánaib
284] ó ná sáilfe a lúag.
- 285] Dosbera do shenóirib,
286] do fhedbaib, ní bréc,
287] nístabra do phecthachaib
288] lasm[dot]é imbed sét.
p.319
- 289] Dosbera hi fírdochtai
290] do cach óen ar n-úair,
291] cen adbchlos, cen athmaithim,
292] ar is hé a mbúaid.
- 293] Gabáil inna n-écnairce
294] mór a n[dot]dile duit,
295] hirmaisiu cach æentrátha
296] dia mbentar na cluicc.
- 297] Tráth tiagait do chelebrad
298] fir betha co mbúaid,
299] co rop ann sin dechais-[s]iu
300] ná rap cách ar húair.
- 301] Aiffrend lathaib téchtaidib,
302] domnach la dardáin,
303] menib é cach ænlaithi
304] iar ndígdi cach clóein.
- 305] Aiffrend for na cristaidib
306] ocus for cach grád,
307] aiffrinn for na fachaidib
308] óthá min co már.
- 309] Ar cach óen roairiltneig
310] ria sunda do chách,
311] ocus airiltnigfes
312] óniú co tí bráth.
- 313] Deithbir lim i sollomnaibh,
314] becc nach hé mo rád,
315] féil[e] apstal, ardmartir,
316] féile creadal cád.
- 317] [In] tan tiastar don aiffrinn,
318] is húasal in rád,
319] congain cride, telgud dér,
320] turcgbáil inna lám.
- 321] Cen fháilti, cen falabra,
322] co cennsa, co cói,
323] co ndílgud cach ancridhe
324] fil, biäs, robói.
- 325] Co síd fri cach comnesom,
326] co n-imeccla máir,
327] co fóisitin duälcha
328] tráth raga do láim.
- 329] Dá cét slechtain la biäitt
330] gach laithi dogrés,
331] na trí cóicait do gabáil,
332] ní furáil in bés.
- 333] Mad áil duit comhét do gráidh
334] fo mám Spirta glain,
335] ní roloinge, ní chotla
336] la túatha hi taig.
- 337] Ní raib serc mór hi[t] chridiu
338] acht serc Dé nammá,
339] [ar is] glan in corp dia téig,
340] rob glan téis do á.
- 341] Dlige a chomal[n]ad in so
342] hi sgriptúir fofúar,
343] mad sacard his é a thechta
344] ná rop tharmtheachtach trúag.Finit.