Maircc taircébai ind-aimsir a mbia saerbráth cin chaemgnímha, cráes cin timmarcain, gairi cin ainmnit, trátha cin chelibrad, étrad cin timdibi, lánamhnus cuiliuch, díall fri coibdilcha, tathain cin ernaighthi, laxa cin lubair, lesci cin erlathadh, culi co cesacht, immedh cin altugud , coite cin tidnacul, timdibe n-almsan, indarpai n-óeghed, dorair do lobraib, fognam do thrénaib, caillti cin eslabrai, fortlúamnae cin fosta, cridi ndúr cen todhiúiri, húaill cin begdhataid, díumus cin umaldóid, comaighthes éttrocur, lethard condartha, díubairt coibnesamh, snadmandai cen suidiugud, fíadhain cen cumni, tráethad cin gíallad, crocha cen cimbethae, carcrae cen bidbadha, flaithius a n-ilgablaib, rechtgi cen dlúthagud, úathad ndaghdáine, {folio 42a} clanna gendtlidhi, celle co cotriuh, airchinnig anetlaide, sopul fodhardach fo-gail éxomoil, éccnuch coipniusam, mac fri hathair, ingion fri máthair, sósar fri sennser, desciupul fri maigistir, miscais fogluma, dermad foircetail, dímhigin for eccnoi, costad for nóisip, clérchiochd cin cennsai, crábutth gen diúitti, lérie cin déserc, lattrainn chosnomaig, cosnom ecailse, toidecht fri soiscélai, dímiccin an Choimhdiodh, nemeadh cin imfochaid , ár for anmonnaip anglanai , foirciottal nAncríst, costad am dioabal, fognom do pecthaib a ndeod an beatha. Dublaithe a ndeouid an domain. Maircc taircéba .