Corpus of Electronic Texts Edition
Cenn ard Ádaim étrocht rád (Author: Airbertach Mac Cosse)

Another copy in Codex Palatino-Vaticanus 830 ed. Stokes, [Kuhns] Z Vergl Spr 31 (1890) 249-50, collated Güterbock, Z Vergl Spr NF 13, 94.

{MS folio 46 rb 41}

    1. Cenn ard Ádaim, étrocht rád,
      a tír grinn gríanna Garád,
      a bruinnichor, nád bréc brón,
      a tír álainn Aradón.
    2. A brú a Lodain is lía,
      a chossa a tírib Goría,
      is Día do-rigni dia deóin
      a fuil do usci ind aeeóir.
    3. A anim do thinfiud Dé
      do-ridnacht dó, ba gním glé,
      rí condn-ic bráth buidnib drenn
      is lais cach fáth, cach forcenn. C.
    4. Airbertach roraith cen ail
      scaíles súithi síthamail,
      a Latin i n-Goideilgc nh-grinn
      is Mac Cosse rochaemchind. C.
    5. In rí rodelb nem im gréin
      is das-rigne dia ógréir
      iffern 's in muir medrach mend,
      ocus talam a forcenn. Cenn ard.
    6. Innocht féil Tómais4 cen tláis,
      ba súi sóbais fri cach séis,
      Tómas apstal, alt cen baes,
      ó aes mór n-astar rochés.
    7. Díar' cechaing sair, síd cen meirg,
      i n-India aird erctha buird,5
      is lais, nirbo lén in lerg,
      ro marb in ferb dia bois buirb.
    8. As-bert Tómas, nirbu dúi,
      athesc do bais díriuch dói,
      bud in crob dia n-dernais col
      i m-bélaib coraindiu6 lae.
    9. Íar sain cing immach in laech,
      cíarbo gaeth, fo-fhúair cath crúach,
      cid ferda ro fer a gleó,
      ro marb in leó, cíarbo lúath.
    10. A lám ind laích cona lí
      fo-fhúair sár saer for bith ché,
      dos-beir in cú ar bélaib cáich,
      feib ass-ebert in fáith Dé.

      11. A Dé dúlig.