- A Dé dúlig adateoch,
is tú mo rúinid co rath,
rim-sa ní rosoa do drech,
úair is tú mo breth cen brath.- Is tú mo rí, is tú mo recht,
is let mo chrí, is let mo chorp,
notcharim a Chríst cen chacht,
úair is lat m'anim innocht.- Ní beo 'ca díchlith, a rí,
{ZCP 3 }
rombeo it' rígthreib frim ré
doroimliur in fleid dot' méis,
nímfargba dott' éis, a Dé. A.
- Cethrur do-raega, ní dalb,
Duíd fri cétal na salm:
Asaph, Eman, étrocht rún,
Ethán ocus Ithithún.
- Radas-córaigset fón clais
{folio 46va}
in cethrar co céill cainmais,
cíasu Duíd rodas-can,
is dóib-seom da-aselbtar.- Deich cét i n-díaid cech fir díb,
ba slúag dírecra dírím,
fond óenchlais ic molad Dé,
cia ceól bad ferr for bith ché? C.- Cinnas ro chanta in cech thur,
in tría próis nó in tría metur?
is tría metur, medar nh-glé,
feib asind-fét Círine. Cethrur.- Ór h-esriud bátar, cía bé,
i n-amsir móir-maic Iasse
ina m-blogaib la cech dronhg
do mebuir lasin popoll.- Estras dos-farglam íar tain
i n-ord n-óentad n-óenlibuir,
ro suidig rempu, réil mod,
argument ocus titol.- Cid nád gaibter in cach dú
a tituil rasna salmu?
dáig is dó thuctha, is dáil nh-glain,
do sluinn síansa asna salmaib.- Ardos-roet eclais Dé
i n-ord n-etal n-airnaigthe,
conid de gaibdi cen chol
fir domuin a h-ur i n-or. Ór.- Cetharda i salmaib, séol nh-glé,
cétna stair, stair tánaise,
fo-gabar indib, ní gus,
síans sóer ocus morolus.- Is friu berair cétna stair,
fri Duíd, fri Solamain,
fri h-ingrintide na slóg,
fri Saúl, fri Abisolón.- Stair tánaise sluintir sunn
fri Ezechías, frisin popull,
frisna rígu, réil in clú,
fri Moíse, fri Machabdu.- Síansa na salm cona snais
fri Críst cáid, frisin n-eclais,
morolus íar sin for leth
fri cach fírián find figlech.- Sechtmoga blíadan ar bith ché
bae Isaias ic fáithsine,
fri ré cethri ríg, nád chél,
bátar for tír n-Israhél.- Ozias, Iotham, étrocht días,
Achaz ocus Ezechías
co luid martrai1 ar Día
i n-deriud flatha Ezechía.- Noí blíadna déc2, bríg ro-clos,
ó martrai móir-maic Amos
is ed sain do blíadnaib bías
co fáithsine Heremías.- Do-rinscan fáithsine ar Día
tres blíadain déc Iossía
co m-bae ic fáithsine íar sain
dá fichit blíadain is blíadain3.- Do-rinscanad, cet ó chén,
fáithsine ard Etzechél,
tría ficheit blíadan, búan cís,
buí ic fáithsine acht ré trí mís.- Deichtreib do brith i n-doíre
co n-immud a h-ilmoíne,
déitreb dílsigthi ó Día
sechtmad blíadan Ezechía.- Deichtreb delbda, dingnaib dál,
ó ros-fuc Salmanazár,
a dó cethrochat is cét
cóic blíadna sain srethaib sét.- Co rucad in détreb dron
i n-doíre la Nabcodon
a trí, a deich is dá chét
do blíadnaib sain srethaib sét.- Ón chétdaere ar deichtreb duind
co tríall athnuigthe in tempuill
cen chuit merthais mod4 ron-sná,
is fír senchas, ní sechta. S.- Dá minfháith déc derbtait de
ocus cethri prímfáithe
ro dánaigthe a dánaib Dé
tría secht fáthaib fáthsine.
- Tría oibriud, aidbliu cach clú,
tría airdib, aidblib iliu,
tría físsib Dé do gach dú,
tría aslingthiu, tría ainhgliu,
tría guth anniúl, nássad nh-glé,
tría thinfisin fáithsine.- Fáithsine na salm i fus
do gein Críst is dia baithius,
dia frescabáil, in cach dú,
dia céssud, dia esséirgiu,- Do innarba Iudae, cen geis,
do thabairt geinti ar ireis,
do mórad fírinni Dé,
do dínsem cacha clóene,- Do messemnacht Críst, cain clú,
for bíu ocus for marbu,
do h-eissérgi in betha,
do delmaim in mórchetha. Cetharda.- Cóic thintúda, cain in clú,
at-chotaiter for salmu:
tinntúd Simbaig, seól co m-bríg,
ocus tintúd saer Septín,
tintúd Círine, céim nh-dil,
tintúd Teothois is Aquil.- Tintúd Septín, ássad nh-glé,
is é-side seichmit-ne,
ro tintáiset súid, seól nh-dil,
a h-Ebru, a Gréic i l-Latin,
ro certaig Duíd íar ceist,
fo obil is fo aistreisc.- Aurnaigthi dúthrachtach dil,
airégim ria fochidib,
deprecáit fri Día, dían mod,
escoine co tairchitol,
i salmaib sein, seól as lía,
cibé nos-gaba cach día. A Dé.- Tréde dlegair in cach raind,
luic is amsera is persaind,
at-chotaiter sunn san chan
ría nh-gressaib athar Solman.- Roda-scríb Duíd ó Día
i tír airmitnech Iudía,
ros-cachain dó dín cach dú
i n-orddun, i n-arddrígiu.- Cipé nos-gaba íar fír
ricfaid óentaid Hiruphín,
ní ba mac báis íar nach breith
bíaid it gnáis, a Dé dúlig. A.- A noí nochat, nássad nh-glé,
cét comlán la cóic míle
ó thosaig domuin, delm nh-dil,
co gein maic Dé i m-Bethil.- Ó génair Críst, clú cen bét,
a dó ochtmogat noí cét5
cosin blíadain bae cen chlith
calaind Enair for cúicid.- In lín blíadan, mílib gal,
ó thús domuin co céssad
fiche dá chét is dá sé
ocus árim cóic míle.- Ocht mh-blíadna déc derbdait de
acht fil co díaid in míle,
i fail íar sain, sorcha in t-sreth,
ní fitir acht Día dúlech.6A dé.