Cid ara n-apar brón i n-nim? Ninsa. Eli & Enóc ro-gadatar in Comdid ara m-brith 'na corpaib dochum nime ; la febas didiu a n-arilten fri Dia for talmain & ructha dochum pardais ina corpaib criad. Ataat iarum na h-anmand gela, glana, etromma, áerda, tanaide impu 'ma cuairt for luamain i r-richtaib anhgel. Atat-som immorro i. Éli & Enóc ina corpaib criad, tromma, cepdai, & na conétat comaitecht. Is brón & torsi mór leo-som ón cen chomaitecht na n-anhgel condat é-sin dá brón flatha nime.