Corpus of Electronic Texts Edition
Saltair na Rann (Author: Unknown)

poem 162

162.


8313] Il-lathiu indluain lainnerda
bratha frisndalat píana,
ferfait arbair aingelda
catha fridemna díana.
8317] Troethfaidir drong dergnaide
triadremnu tolaib guba:
rian-angliu centerbaide
mebais fordemnu duba.
8321] Conatóisiuch dolbaide
Lucifer léom asdúru,
in-Iffern ogolgaire
fochichritar forcúlu.
8325] IArsin bertair fírbretha
fíadgnúis De forclainn Ádaim,
scertair iarnangnímgreth(a),
dechraigfiter 'nandálaib.
8329] Dlomthar lat drong demnachda
ipíanaib úaraib Iffirn,
peccthaig censil nderbgarta,
fochiabraib cruadaib crithfeidm.
8333] Cechfirian foglangeltad
fordeiss Dé bí, buan bithfeidm;
fodimiad cechanrechtach,
forlaim cli dochum n-Iffeirnn.
8337] Indformdig, ingúbrethaig,
inchosnamaig, inchuilig,
indruid, inderetecdaig,
ingeint, ingalaig guinig.
8341] Inmeirlig, indadaltraig,
ingoaig gloraib guba,
intsantaig, indiumussaig,
indeithchich linib luga.
8345] Indferggaig, indetradaig,
induinoirgnid condremnai,
aes ecnaig, aes athchossain,
aes indindlaig nosdedlai.
8349] IT he sin inprimpeccthaig
artrebat hIffernn húarach,
tiagait cenni d'fírettlaib
laDemun ndremun trúagach.
8353] Dochum pene suthaine
icarcair guires grithu,
iatsom nipdat duthaine
icafulang triabithu.

p.123


8357] Bethu brónach bithtoirsech
ítu, dochtai iarsetaib,
cuairt glórach, niclithchoimmsech,
uacht, gorta, crith fordetaib.
8361] Dia dil, tuistid dítnidi
nandúla ndelbda ndegrach,
ronsoera argliphiti
nandemna in-Iffurnn engach.
8365] Indnoib isindfírianaig
doreir indAthar nemda,
congerdar cendímiada92
dochum flatha sechtedma.{folio 40 b 2}
8369] Nassad side siráidde,
amru cechnduis cenchithu,
imcaissiu naTrinóite
ognúis dognuis triabithu.
8373] Bith isámaib sonmige
iarmbas cendomgnas ndangen,
'nandalaib cendonmige
dogres hicomgnais angel.
8377] Cenchrini, cengalara,
censním, censaethar sníid,
cenoccurus cotulta,
cenaurchra broitt nabíid.
8381] Bith isoere sirsoillsi,
classa caine, ceoil gelbda,
innoebi censirthoirsi,
cenhass, cenáes, cenerchra.
8385] Adroillemm, adaittrebam
oentaid aingel cechtratha,
liarCoimdid cocaitchennam
iarmbuaid abrethaib brátha.
8389] Adfiadat indécnaide,
doréir naríagla asmóo,
imriadat cohéttlaide
mili bliadna 'sindlóo.
Il-lathiu indluain lainerda.