Corpus of Electronic Texts Edition
Saltair na Rann (Author: Unknown)
poem 156
156.
8101] 'Sinchethramad lithlathiu
cetaine, cetaib omun,
ticfe athach écaine,
croithfaid inn-huili ndomun.
8105] Turcgeba inmuir mormongach
othalmain, tolaib tine,
cumgeba agrith glorglonnach,
coroa niulu nime.
8109] Nuall nambledmall mbeccedach
nambiasta mbélderg mbirach,
sluaig nasedlang setfadach
forsintracht tírimm tinach.
8113] Dofuit sís arithisi
trethan tromm, toromm n-adbal,
connachfess afithissi
cid teite fothuinn talman.
8117] Tic tathellach tathlúgud
congnithaib fiadnaslogaib,
atherruch friaathnúgud
combi 'nachrichaib coraib.
8121] Gaetha galacha gera,
ginmara, cetaib ahél,
combruet nafidbada,
comberat leo 'sinn-ahér.
8125] IAlla ainble, engacha,
imriadat cech n-iath n-allmar,
diana, daingne, dedgarcha,
diallait forbiad intalman.
8129] Ticfait airde inganta,
casrai cruaidi, cru granna:
sil n-Adaim attimmarta,
trúaga cechdu andala.
8133] Atbera insluag sirechtach
sil n-Adaim sernait srethu,
an-athesc truag, dínertach:
'ferr dún bas indabethu.'
8137] Bresma búana bruthacha,
gretha grainne congairgge,
sreba srúama sruthacha,
consceraiter frifairge.
8141] Fillfidir nem, nassad glan,
afudomnaib aadbair,
cinnfidir agnas adbal
combruifider fritalmain.
8145] Mac mor Maire Ingine
ronsóera laprimmaithiu,
arcachn-olcc n-óg n-indlide
'sinchethramad lithlaithiu.
'Sinchethramad lithlathiu.
p.120