Corpus of Electronic Texts Edition
Saltair na Rann (Author: Unknown)
poem 148
148.
7669] Rí Roirscart isroglan
tempul sóer segda:::
tegdais dil deoda Dé bí,
bid teg n-amra n-aurnaigthi.
7673] Rí rothodiusaig ahuaig
Lazair balór dolánbuaid,
iarnaécaib, feib roclos,
in-adnacul cethri ndenos.
7677] Mori réil, coméit glaine,
imrualaid muir nGalaile,
cossaib tírmaib, deoda gáir,
fescur fiadnaapstalaib.
7681] Ri roshícc fiadchuirib clann
forsintsét nadámac dall,
dianderna donchríaid chéir
combarosc roglan roréil.
7685] Ri rofuc immrim n-amra
indomnuch naglanphalma,
diatucad dó immasech
indassan isint-ochech.
7689] Rí frisin-erbairt inslúag
huili eter tren ocus trúag;
'dena arn-íc triabithu sir,
atbennachda, ameic Dauid!'
7693] ArCoimdiu glé cumtaig rath
turcbaid cechgne cechcumtach,
cain clí cendigna, cenchacht,
mori rigda rohirscart.
Ri rohirscart isroglan.