Corpus of Electronic Texts Edition
Saltair na Rann (Author: Unknown)
poem 145
145.
7573] Ri Róaen, Rothroisc coglé,
cethrachait lá ocusaidche,
ardessmerecht docachsruith,
indiamraib dorchaib dithruib.
7577] Ri tharlaic cuce, gné gaind,
nagorta foracholainn,
coroclóad Demun de
triasinn-aimsigud trede.
7581] Ri doraiga teglach ndil
diachumtuch eter dóinib,
dosil Abráim, árim nglain,
dáfer dec doapstalaib.
7585] Ri rochar Petar isPol,
Andreas uais isIacob,
Iohain, Pilípp, blaith angus,
Bartolom ocusTomus.
7589] Rí rochar Madian maith, mór,
isinglanfial Iacob,
Simon isTatha centass,
Matha, Marc ocus Lucas.
7593] Ri rochar dásessiur fer,
bahé atheglach toebgel,
ladeisciplu, noebda smacht,
ado soerda sechtmogat.
7597] Ri arroet bathis fosmacht
cenathis ardeismeracht,
rofigle cengaile gne
inrí dorigne inn-óene.
Ri roáen, rothroisc coglé.
p.112