Corpus of Electronic Texts Edition
Saltair na Rann (Author: Unknown)
poem 121
121.
6837] Fergach fris Fíadu, féidm n-úag,
aran-árim namórslúag,
uair narbo leis asnach cruth
ambíathad nach an-étiud.
6841] Bai ferg aili laDía ndil,
lathigerna donóebnim,
diar'ort amílid, mét gal,
tuc amnái iarnamarbad.
6845] Roraid Spirut Dé friGád
aithesc glé, crichid, comlán:
'ráid friDauid, nigó gaib,
roga dó artribbrethaib.
6849] 'Secht mblíadna dó bochta búan,
ocus gorta conaimlúad,
no trimis agair riacreich,
no gris galair trib latheib.'{folio 36 b 2}
6853]
Roraid Gád fri Dauid tan,
ciarbochrád riamenmanrad:
'toticfa dígal nochath
triath'imrádud ndiummasach.'
6857] Corogaid Duid iarsein
asoerad foranáimteib,
dígal basmaith lais fodein
tabrad forru diaógréir.
6861] Dauid babibdu rechta
fricachtimnu tarmthechta,
d'fis trialla deochair dochath,
Fíadu fris feochair, fergach.
Ferggach fris Fíadu, feidm n-úag.