Corpus of Electronic Texts Edition
Saltair na Rann (Author: Unknown)
poem 116
116.
6657] Túargabad lais, líth cenlén,
primchathir mac n-Israhél,
forsleib Sioin, srethaib sell,
cor'fothaig Hierusalem.
6661] Suidig forsléib, sossad slán,
Sion snéid, srethaib saergrád,{folio 36 a 2}rosmathig fritoir uasdinn
cathir coir fagabulrind.
p.98
6665] Tricha mili, mod cenhír,
lotar d'ócaib laDuíd,
arcenn nahairce congrad
cotegdais Aminadáb.
6669] Conaclasschétlaib glinnib,
conacruittib céolgrinnib,
con-organ cainiu clíaraib,
comáinib, comórmiadaib.
6673] Bai indarc forcuclaigi gell
'coatabairt diHierusalem:
tarall lám Oxa inn-airc n-óig:
bamarb Oxa fochétóir.
6677] Úair dosfuargaib, rígda ell,
coslúagaib Hierusalem,
arcc Dé thargcai oscach traig
tucad lais donprimchathraig.
6681] Riasinn-airc noib, noithi mail,
lingged arfailti ndermáir,
Dauid frialuth, línib smacht,
amal druth icfurséoracht.
6685] Badegrach rodéc immach
Míchol menmnach, meruallach
forsinríg, reim cendochta,
baréil di ahimnochta.
6689] Rochúrsaig inrig fomeirg
corondúsaig fomorfeirg,
cotarat Dauid, delm n-om,
amallachtain arMíchol.
6693] Incathir centomaidm tenn,
dían' comainm Hierusalem,
cain cumtach, clú cotagab,
oscachdu dofúargabad.
Túargabad lais, líth cenlén