Corpus of Electronic Texts Edition
Saltair na Rann (Author: Unknown)
poem 113
113.
6557] Rogab Dauid, tola nglé,
rígi n-ogda n-Iudaidé,
iarngormchath nangruad ngúr,
itorchair slúag imSaúl.
6561] Roaittreb in-Ebrón án
rochaitreb Cebrón comlán,
fortreib Iudae, cengris nglé,
sé mis ocus secht mbliadné.
6565] Fóidis Dauid, censíl mbróin,
techt coIspas mac Saóil,
cotuctha dó, saer sluinter,
Michol chaem achétmuinter.{folio 36 a 1}
6569] ISpas mac Sauil cenlén,
rogab ríge n-Israhél,
dafuc Michol, ciarb' olc leis,
oAlathis mac Lais.
6573] Corucad doDauid húad,
'arbuide n-Iuda n-ollmúad,
armbeith iarmbes hitóebtaid
dogres innarfíróentaid.'
6577] Bai cluichi garb, glinni glór68,
forochair linni Gabon69,
eterAbnér mac Néir nair
ocus Iob mac Sairb soeráil.
6581] Cethror arfichit coglé
doBeniemin is d'Iudae,
fochutrummu cenclói clu,
dorochair 'sincétchuinnscliu.
6585] 'Singleo thánaise iarnarím,
doócaib Beniemín,
dorochratar, traig fritraig,
trifichit artribchétaib.
6589] Romebaid incath iarsin
forAbnér conasluagaib
Asser mac Sairb, srethaib scél,
conid ann romarb Abnér.
6593] IOb badicerta crich,
toisech míltnechta Dauid,
macSairb, baglanger imgail,
romarb Abner 'nadígail.
6597] Banna ocus Recab, réim rúin,
marbsat Ispas mac Saúil:
frisretha sell iarnadíth
p.97
rucsat achenn coDauid.
6601] Céin báe Dauid forIuda trén
riaríge mac n-Israhél,
in-Ebron frignim n-aircc n-íd
bretha secht maic doDauid.
6605] Ammon asinser, slicht n-óg,
Eleab, Abisolon,
Athenoias, frigart nglán,
Asfothías ocus Esrom.
6609] Rí dorát recht n-Iuda n-oll,
doDauid deoda drechdonn,
srethaib slánaib slógaib sid
congrádaib rogab Dauid.
Rogab Dauid, tola nglé.