Corpus of Electronic Texts Edition
Saltair na Rann (Author: Unknown)

poem 109

109.


6473] Saul sírach slaide sluaig
basnímach iarn-éc Samúail,
cosaibe fogaili gné,
cennoibi, cenfáithsine.{folio 35 b 2}
6477] Mac Cis Cenlíthaib folén
forcríchaib mac n-Israhél,
rodlín snim sribgrinn, slicht nglé,
ohingrim meic Iesse.
6481] Bái mac Ciss icocud chían
friDauid conamórmíad,
cotorachtatar otír
sluaig fer fortrén Philistín.
6485] Dor'inól fribualad mbal
sluagad n-Israhél n-armglan,
aracenn, cengailib gne,
forcláraib cainib Giluae.
6489] Indadaig riasincath ngúr
robai snim mór forSaúl,
arnaconfitir triarath
cia fors'maidfid inmórchad.
6493] Dodeochaid Samúel iarsin
coSaúl inn-aidchisin,
con-erbairt fris, rád cenbrath:
'notmairfider immárach;
6497] 'Ocus dotrimeicc, mod cert,
hit'chinaid, it'tairimthecht,
ocus ár trog, díglach, trén,
forslóg n-írach n-Israhel;
6501] 'Ocus roscarad frit'scél
ardflaithius macc n-Israhél:
t'imthacht friafégad cofír
doridnacht Dia doDauid.'
6505] Inri scaras gói frifír,
congaib clói, glanas anfír,
dorat adigla, deilm n-og,
ruc breith primda forSaol.
6509] Intrath rothaitne ingrian glan
oscechrían imdreich talman,
feib bagnáth dóib dul dochath
rogab cách achatheirred.
6513] Gnísit cath ciana, cét nglonn,
snisit frifíana ferdrong,
icath Giluae conaslog
romarbad iarsin Saól.
Saul sírach slaide sluaig.