Corpus of Electronic Texts Edition
Saltair na Rann (Author: Unknown)
poem 100
100.
5929] Dorigensatar sid slan
Dauid ocus Ionathán,
íarriaguil Dé, fochucht chain,
friaré hifut asaegail.
5933] Dorat Ianothán iarfír
huad aheirriud doDauid,
eter etach friríad rath,
eter gae issciath ischlaideb.
5937] Rochinnset acotach cáid
cennach cocad imchomdáil,
cidolcc, cidmaith, triabith sír,
etir Sául isDauíd.
5941] Duthracair Michol cenmeth
abráthair, aairchinnech,
ambith icairddes cendíth
Ionathán ocus Dauid.
5945] Bái Dauid foglórai grad
iarcórai friIonathán,
innathig fomíad, fecht ngúr,
octriall dothecht coSaul.
5949] Rogab Míchol, medar fír,
cotrebar tinchosc nDauid:
'nidechais frislemna scel,
coríg n-ergna n-Israhél.
5953] 'Náteig cotdiss, agass glé,
comac Ciss cencommairgé,
babaeth meni adair rún,
nátabair toeb friSaul.'
5957] Doluid Saúl frisnúad sid
coluath dothegdais Dauid,
fritairsin Dauid ifus
cenaigsin, cenfurachrus.
5961] Induair dodechaid, tarm trén,
ri croda clann n-Israhél,
ann dothaet Dauid, delm ngúr,
immach forsét coSaúl.
5965] Sernai Saul insreth slain
imthreib nDauid commórgráin:
roiad marnathraig, níth nglé,
imchathraig meic Iessé.
5969] Mar'tchuala Míchol inmbreis
conrúala insluag 'montegdais,
rothinól dintoirt tachtai
nalínbroit, nahanartai.
5973] Dor'imthas, bahé ingnim cass,
ambé findchass fíramnas,
rosuidig cosuairc naslaimm
immuacuaird immoncerchaeill.
5977] Conderna fúath indfir de
colúath innagaethrige,
p.88
feib ba bés bith icétlud
dogress doib foainétgud.
5981] Rogart asdorus immaig
smacht solus Saul sáergein,
roraid comall, monor nglé,
'infail tall mac n-Iessé?'
5985] Roraid Michol, mín aguth,
friSaúl diachennsagud:
'menipcél críntaig dochath
mochen tíchtain degathar.'
5989] 'A Michol merda, menmnach,
gelda, genbda, comdelbach,
taet 'mach fochléire cachta
doché ile, dochomalta.'
5993] 'Aní condnigi, ameic Ciss,
achlí gaili ceneisslis,
{folio 34 b 1}atá sunn, cennach gláim nglé,
eter daláim th'inginé.'
5997] 'Ciabeith dolám, lathar nglé,
dardrochmac n-an n-Iessé,
ninanais fritindremm tinn,
ahingen Achinoym!'
6001] 'Cidnech badmó miscais lat,
arí Israhél con-armacht,
tissed ríandígla fom'guth,
nirígda duit mosárgud.'
6005] 'A Míchol mer, menmnach, mas,
ahúa engach Athemas,
nítbia frit'dil ndogra nder,
rígdomna mac n-Israhél.'
6009] 'A meic Ciss fort'glonnaib gaib,
nabris fordochommorgeib,
na63 báid triaderbága trén,
cenn n-erbága n-Israhél.'
6013] 'O dorala, rúathar nglé,
frim'thala mac Iessé,
duit, abé féne fechtach,
nibacéle cridserccach.'
6017] 'Ameic Ciss clechtaig, gnim nglé,
nahettraig mac n-Iessé,
tairinn thogail gnáthaig ngil,
nasáraig dodegingin.
6021] 'Násáraig Ionathán uais
congail gnáthaig, corochrúais,
cenolc, cenainces, cendíth,
rogab cairdes friDuíd.
6025] 'Nasáraig Samuel fáith finn,
congab grad núalnar, náebdind,
nasaraig cengáisi nglór
Máisi, Ioséph, Iacób.
6029] 'Nabris báig n-airech noláech,
noainech nafer fírgáeth,
nagnáthaig ni assia doscél,
nasáraig Dia n-Israhél.'
6033] 'Cia dobertha dam frimthóir,
aben, cét n-unga ndergóir,
argais galais no gart ngle,
nianais mac n-Iesse.
6037] 'Rodonanacht Dia donim,
cain glanalt cenimresain,
fográdglunn, cenchúairt nglassa,
dochúaid uait donfabullsa.'
6041] Foruirecht Míchol nanníth,
cendul indegaid Dauid,
corocht Dauid, reim iarruth,
icéin in-oen nandithrub.
6045] IArsin adcocrat cencrad,
Dauíd ocus Ionathán,
cor'chinnset cenchíthu cess
triabithu 'nambithchardess.
6049] An-óentu dogress cechcruth,
atóebtu cendíscailiud,
fofiadnaib indinngnaib gal
p.89
iartimnaib dorigéntar.
Dorigénsatar síd slán.