Corpus of Electronic Texts Edition
Saltair na Rann (Author: Unknown)
poem 89
89.
5641] Ri roraid friSamúel súg
con-erbarad friSaúl,
condechsad lín athor triath
cendil d'argain Amaliach.
5645] Conátuctha lais ambrat,
étach, nahór, naargat,
atairbirt uili frilár,
etermnái isfer, badergár.
p.83
5649] Centáin cethra, cengraig cóem,
centróetu muc foroenróen,
connátuctais leo coatech
almai gabur nachairech.
5653] Dodeochaid Sául iarsein
cosindneoch fuair diócaib,
coroslig seirgib selggaib,
díglaib demnib drumdergaib.
5657] Tri cét míli, maith inscél,
doslúagaib mac n-Israhél,
ocus deich mili, mor mbla,
diocaib treibe Iuda.
5661] Rosaraig Saul nasluag
ani roraidi Samúal,
tuc leis toirti attír natriath,
ocus tuc ríg n-Amaliach.
5665] Togach rohiccad infiach
friAgach, friAmaliach,
osbri niblaith abríg buan
inRi roraid friSamúal.
Ri roraid friSamúel súg.