Corpus of Electronic Texts Edition
Saltair na Rann (Author: Unknown)
poem 88
88.
5609] Fecht dodeochatar otír
fianna feochra Filistín,
sluaig sin sirden frislait srén
dodilgen mac n-Israhél.
5613] Arim asluaig, slicht cenchol,
línib atuath, atromthor,
secht mili fer, ferr cech ngail,
con-armaib, congascedaib.
5617] Tinólsatar, tola tren,
slóig mora macc n-Israhél,
{folio 33 b 1}bahuamnaig triamnaig diatraig
combatar uili in-oendáil.
5621] Cororaid moRí noebnar
sech cach n-oen friIonathán,
condigsed íarfoimsin fir
do'rfaicsin sluaig Felistin.
5625] Dochuaid Ionothan forleth
aoenur 'saarmiger,
coromarb díb, díni nder,
fichi mili fer fortrén.
5629] Ri dorat digail, delm n-án,
forrígaib rian-Ianothán,
oMachim, comílib slóg,
cocrich n-iraig n-Achilon.
5633] Nir'línaib fer, formnaib snas,
lainib ligdaib, ler n-ernmas,
nisnacht osbrí brigda brass,
acht moRi rígda rinnmas.
5637] Rucsat réim, rod rainni sloig,
dochlod clainni Iacoib,
fribríg bert, fricumtach ngal,
otír fecht dodeochatar.
Fecht dodeochatar otír.