Corpus of Electronic Texts Edition
Saltair na Rann (Author: Unknown)
poem 79
79.
5277] OShunn Roscarsat, gnim glé,
friadrad rig noebnime,
rodasbate plág dibaid,
dosrat focachtromdigail.
5281] Dosrat cenbaide fomnad
fodóire, fobithfognam,
Gussán garg, crodu cechnia,
toisech Mesopotamia.
5285] Ochtmbliadna doib, toromm n-án,
fodubdoire doGussán,
conastorslaic uad triablait
Nathanel amra aurdairc.
5289] Rodasdáer coleir colór
reil ri naMoáb Eglón,
cotuc Ógeth huad triachath
arécin iarnamarbad.
5293] Rodasdáersatar diambríg
Sissarra ocus Iabín,
condossaersat dicechthracht
Diborra ocus Barác.
5297] Fosrordingsetar codían
Amalech ocus Madían:
gle rodasaer Gedeon cain
lafortacht Dé donoebnim.
5301] Diatarfas indlassar lór
asindailig réil romór,
diafer broen forincnai nglain
diambai tart forsintalmain.
5305] Ort trifichit mili mas
artribcetaib, gnim n-amnas,
inidapad Oreb de
Psalmanae Zeb is Zebe.
5309] Bai clann Israhél cachtreib
fodóere, fodeirmitneib,
cenbuaid, cenbrig, cenbaeg mblat,
friarig osunn roscarsat.
Oshunn roscarsat, gnim glé.