Corpus of Electronic Texts Edition
Saltair na Rann (Author: Unknown)

poem 51

51.


4185] Ri roráide friu cenlén
friclainn n-amrai n-Israhél,
conderndtais doib eclais nglain
ocus indarcc testemain.
4189] Dias doib frisóirsi slecht,
fricerdacht, friprimgoibnecht, {folio 29 b 2}Adiar adma irdaig múr,
isint-amra Ithidún.
4193] Dotreib Leui, lathar ndil,
doreir indrig donoemnib,
sechtmoga fer, fobaid fecht,
friacobair, friatimthirecht.
4197] Cetnagnim gnisset marchloc
dabach humai istudloc,
con-ilur delb, lethan lecht,
trethan derb trifer ndeec.
4201] Gnim tanaissi, tadbat ruin,
admat adfét inscriptúir,
eterfiru ismaccu ismná,
bacc iairnn cechoenfir iarma.
4205] In tres gnim, roglé cenchol,
tegdas Dé tabernacol,
nir'bu dínnim laDía ndil
conamílib mírbailib.
4209] Cethramad gnim, indarc úag,
cain imracht fricach n-imlúad,
ór delgnaid, dín docachthreib,
amal cachscrin n-ildelbaig.
4213] Ri dororainn dóib, babúaid,
inn-eclais n-orhuill noebúaig,
etirfot, cenchaillti cert,
etirairddi ocus lethet.
4217] Tricha cubat, comul nglé,
etirlethet isairdé,
coica cubat, fochucht cruth,
innafut frisuidigud.
4221] Cláraib cainib crotha glain,
slánaib, soeraib, sodelbaib,
iartinnrud tairchil cachgreim
dofidrud saindil secheim.
4225] Cuairt cethrochair, cumtaig gd,
nirbodrechrothail dermár,

p.62

cathclái gelbdai, gnim n-ogdai,
fachlái febdai forordai.
4229] Ri rosorddaig clethaib clar
dosforgaib srethaib soergrad,
rodascinn frihergna alt,
dáchlar dec ségdai sescat.
4233] Dáchlar déc 'mondorus ndron,
caintomus cenimmfordol:
cethriclair déc, derbdair sein,
serntair immonsenisteir.
4237] Tri cláir fichet incachsliss
clichet cenag, cenanfiss:
dáchubat, nidechelt tair,
bid il-lethet cechoenchláir.
4241] Cethricláir fosummib dé
inhuillib naecalsé,
feib dorumat, rigda rad,
trichubat incech oenchlar.
4245] Se fotha dec, derb cenlocht,
ar secht fichtib doarggot,
eturru islar, lith fribaig,
dáfotha dib cech oenchlair.
4249] Airddi nafochrai47 folí
huasnafothaib findruini,
cubat frifut alame,
cenimforcraid n-imhairme.
4253] Dorus sneid sair segdai máil,
solus frigrein cain comláir,
cenardgrain gnim, cian cachcruth,
intsanctair 'nafiriarthur.
4257] Cethriclair comlain, gnim ngle,
occongbáil nasanctare,
cofothaib fiadtuathaib treib
conafuathaib forordaib.
4261] Altoir fridorus antuaid
friloscud n-edpart noebúaig,
altóir aurgnaidi 'nadess
friaurnaigthi nadimchres.
4265] Inprimaltoir cosindrath
frignimgart gloir roturcbad,
cechthucht foardbilib óir
baharddidir ucht Aroin.
4269] Deil telchinni tiar istair,
anniab amal chorcarglain,
dírge cechtolgdail tailce
fritorgbáil nadrumslaite.
4273] Tuiri tren diriuch dolar
frisiniud sruthi soergrad,
fondrumslait déin derbtha slóig,
cotribdelbaib dec dergóir.
4277] Coluid triasindrummslait druin
frituidmi nasuanemuin,
fair tuas cenlen, laid lorda,
én uais con-aib forórda.
4281] Coroiset lár dicechleith
fornaclaraib hicomsreith,
gníthi ondrumslait immach
sithbi n-anart n-ildathach.
4285] Oenanart tairsiu anechtair,
coemthoracht ciacomnertaid,
frisnima seirgthi sóeba,
frignima, frigarbgaetha.
4289] Clar diargut, gle cenmeth,
cechtarde nadaprimleth,{folio 30 a 1}iartuidmidib, togach tóir,
sechtmoga folach ndergóir48.
4293] Fri sreng doib, fricuimrech ngle,
nan-anart coir coimtige,
bacan dron dergoir togaig
dochur forcechn-oenfolaig.
4297] Suidigdir tairsib immaig,

p.63

diataibsin donaslogaib,
slessa set frisella slog
tricessa dec dodergór.
4301] 'Dénaid fritarba cechdruing
arcc amra, demin forgaill,
'monfleisc, 'moanmaind, monorngle
imnolecdai taiblide.
4305] Cethricubait, comol ngle,
dobith ifut naairce,
atri 'naairdi, mod cert,
ocus adó 'nalethet.
4309] Cethridrolaim diór dron
asindairc diahimmarchor,
dádrol treothu, derg angne,
dondor amra forloiscthe.
4313] Delb hiruphin forsindaircc,
dindór hilarcháin imtháirc,
cofathaib niam, nassaid gle,
coscathaib ascíath scailte.
4317] 'Sintsanctáir suidigter lib
indarc noeb cona aidmib,
isanart sroil, sreth centair,
eter inslog 'sinsanctáir.
4321] Cocétlaib griannaib cechcruth,
cocliaraib, con-airfitiud,
con-orthonaib, cocóraib,
comolbthogaib dermoraib.
4325] Flesc Moisi, flesc Aróin aith,
cenlaisi, línib ollgraid,
coica n-unga n-óir gleglain
cechtarde nadaflescsain.
4329] Flesc maith Moisi, monar cert,
rofer foraesa aEgept,
nathir doilbthe, delgnaid cruth,
derbaid forafiruachtur.
4333] Flesc Aróin, baamra dúis,
gradgloir glanna fiadgelgnúis,
foblath bil bolaid noibe,
fothorud cechdegmoine.
4337] 'Sindlestar lán cosinmaind
cet dior centádrainn,
hisinprimchaindelbra choir
tri cét n-unga nderb ndergoir.
4341] Secht mbenna buana, búaid ferb,
forsinchaindelbrau cruanderg,
gnitis dindor gle glanna,
forsmbitis secht sutralla.
4345] Cuich gela cuairt cennachcleith
suig frisreba suairc sainred,
intu nobruindis bannae
nosuildis nasutralla.
4349] Secht cét unga 'sin meis móir
cocethricrossaib dergóir,
furri adó sechtmogat sla
d'aran remúir nemdesctha.
4353] Incaindelbra 'sindleith tess,
cain, caindelbda, cendimes,
inmias atuaid, taircthi rúin,
cosnabargenaib remuir.
4357] Ilar nacúach, nacód cass,
ilar lestar lór, lannmass,
ilar mías menmaib mórdaib
cosnadelbaib dergórdaib.
4361] Dior huili, ilar ndelb,
condruine, ni mod n-inderb,
nastaba, tolaib gestal,
stomacha istuslestar.
4365] Srethaib sutrall, soillsi scuir,
frisoimsi 'sintabernacuil,
caindelbrai gelbdai glordai
ité delbdai dergórdai.
4369] Forlassad coléir dogres
ola ocuscheir fochomlés,
iarnaterchur fridídnad,
cenherchur, cenairdíbdad.
4373] Tech fricomdail cechtharbai,

p.64

cenchomraid, cenchomlabrai,
cenfáilti, centoirsi traig,
soillsi eterocus adaig.
4377] Tempul diada, dín cech áin,
tegdais rodígrais rocháin,
friacallaim De, sunn sel,
fritinchosc, friforcetal.
4381] Nachastathigi aes baeth,
mná no meicc no laine laech,
nacinged sét asossad,
acht aes fírien fírfossad.
4385] Aés trúag, aes deoda dessa,
athláich ocuslaichessa,
sluaig sin súairc, dúairc, tolaib gair,
impe 'mocuairt díanechtair.
4380] Tiagat 'sindeclais folí
aes óg, sacairt, leignidi,{folio 30 a 2}isáes humal, ceim forais,
íarn-athirge, íarnglanchobais.
4393] In chlass inchleir, bacert cóir,
toirnet coleir dondaltóir,
tairismig, nibatlúamnaig,
athé feta, forhúamnaig.
4397] Gaibed cach agreimm tarbái
doreir Aróin meic Amrai,
glaini glethig friacacairt,
friabrethir inprimsacairt.
4401] 'Dentar lib iarmbes cechcuir
dogres isintabernacuil,
edpart matinda, mét bla,
ocus idpart fescorda.
4405] Bolud naluba ascachthoeb
latorroma inSpirta Noeb,
clu con-áne frignassad,
frislane, frisirsassad.
4409] Ri roráid friu: 'sernnaid sreith
'mondeclais dicachoenleith,
forson reilgce corebaib,
doanartaib oengelaib.
4413] 'Dorus indindliss fodess
cain set solus narb'imchress,
frituttacht Dé, deoda nuall,
friathigid namorsluag.
4417] 'Nabid forn-aittreib, mod neim,
eterchrann caingil isgin:
set inSpirda Noeb foleith
fritauttacht, fritathigeid.'
4421] Bid amne indeclas folí
feib dosrorann int-ardrí,
uascachmaig rodasderscaig
cenforcraid, cenimthesbaid.
4425] Ri dosrat foríaglaib recht
dosfuc ahíathaib Egept,
ishé mal naslog, slan síu,
inri ran raraid fríu.
Ri roraidi friu cenlén.