Corpus of Electronic Texts Edition
Saltair na Rann (Author: Unknown)
poem 48
48.
4109] Anhed robai Moisi istsleib
nochosrala fordagceil,
dorigned leo, nir'gnim coir,
ocdam deligthi dergóir.
4113] IArsain, bamessu cechscél,
dothúathaib mac n-Israhél,
eter firu ismná cenrath,
andul huili diaadrad.
4117] Diultud forríg n-angel n-úag,
bamor ingnim donmorsluag,
ocus ahithi indfeoir gairb
fiaddeilb indócdaim hermairb.
4121] Ferggach friu Fiadu bacoir,
friclainn n-engaig n-Iacoib,
cotarmart tairbert intslúaig
fothuinn talman frioenhúair.
4125] Gorogaid Moisi iarsin,
forsinRíg conaainglib,
coroléiced dó achosc fein
'satimargain diauagréir.
4129] Manibed Moisi, mod ngle,
asbert inRi orddnide,
óenfer díb frigleo nagail
nafaicbed beo fortalmain.
4133] Fiadgnuis Dé, badiada túr,
icfoglaim ríagla isrigrún,
isleib Sinaï, sliucht ngle,
aned cian robai Moise.
Anhed robáe Moisi istsleib.