Corpus of Electronic Texts Edition
Saltair na Rann (Author: Unknown)

poem 46

46.


4049] Batar buidig doDia dron
iarternam doMuir Romor,
robdar dimdaig Dé forruth
oshunn rancatar dithrub.
4053] 'Truag doDía donrat im-mert,
nachanrelic in-Egept:
donfuc iarsétaib cechcruth
diarn-écaib isindithrub.
4057] 'Cenbíad, cenlinn, lethan locht,
cenétach beos arbithnocht,
ronlín bochta, ronbás bath,
dogena ingorta armarbad.'
4061] Ri roráid friu aurdairc dul:
'inhed bethi 'sindithrub,
nochoforbia immaig no taig
airchra bíid no etaig.'
4065] Ri rodosas donmaind blaith
ocus indiall en imthlaith,
inlind friatoir ascechmaig
dofuc doib asindailig.
4069] Srotha indithruib, delm n-ada,
ciabtar nemi nemnecha,
lacach, ciatserba slassa,
doibseom batar somblassa.
4073] Dorigset sét, sliucht combuaid,
al-lam chle frimuir morgluair,
siarthúaid darcach fich frifeth,
focrich n-amnais n-Amaléch.
4077] Gnisit cathu croda ríad
frisluag n-uathmar n-Amaliach:
dorochair mór n-armach de
tall triacrosfigill Móise.
4081] O roláset ár intsluaig
Amalech aurdairc adrúaid,
imsliab Sina, srethaib socht,
rosuidigsetar longphort.
4085] IArcathaib, iarnithaib níad,
friclainn n-íraig44 n-Amaliach,
isléib Sina, sluagda angal,
fobannaib buada batar.
Batar buidig doDía dron.