Corpus of Electronic Texts Edition
Saltair na Rann (Author: Unknown)

poem 44

44.


3945] Roleicset dilmain uadaib
'nandirmaib, 'nammorsluagaib,
samlaid dochotar forfecht
cosetaib amraib Egept.
3949] Cethrichet tricha triamnaib,
indóiri doib dobliadnaib,
in-Egept daill tairbert tren,
dochlaind airdeirc Israhél.

p.58


3953] IArsain scarsat fridóire
Egeipt con-ilur clóine,
iarmbliadnaib coriagail raith
trichat iarcethricétaib.
3957] Dorigset sét, sliucht combuaid,
cenbét ahEgeipt sairtuaid,
cengrissa, bacain intsluaig,
doRamissa, doSochuaith.
3961] Ri ragmas dasfuc trianert
adoire amnas Egept,
dorat nel impu fride
istor tened cachn-aidche.
3965] In tene icloscud intsluaig
Egeipt 'sindaidchi adhuair,
innél dorcha doib fri
combruissitis acairpdé.
3969] IArsin roraidset colainn
sluaig fer n-Egept friForainn:
'tiagam forarcul cenlén,
lecamm uain claind n-Israhél.
3973] 'In dia asdech forbith búan
dorat meth forarmorslúag;
atá iccathugud cotrén
darcenn clainne Israhél.'
3977] Asbert Forainn fergach friu:
'nileicfem arlaesechu,
conostucam lenn imbrait,
latoeb arn-oir 'sarn-argait.'
3981] Dochuaid Forainn conasluag
'nandiad imMuir romra Ruad,
nasluaig remi rosatriuin
ocus Forann fohírdiuid.
3985] Inri dodasaer iarsin
arForaind cona airbrib,
triamuincinn Mara Romuir
dosfuc innan-irchomair.
3989] In muir mór, comílib scel,
triastuc Dia claind n-Israhél,
rodáil rí grene cenrainn
forformnu féne Forainn.
3993] Báe Gaidel friglegelt cain
in-Egept 'sindamsirsain,
dobreth Scotta fiadcachclainn,
ingen airmittnech Foraind.
3997] Atroebaid Gaidel combúaid
dula dó indegaid intslúaig,
uair bafaith, friglea scél,
uamun Déa mac n-Israhél.
4001] IArsain dochuaid Gaidel Glas
il-libuirn lir lethanbras,
fuapraid meirge mara maill
arhuamun ferge Foraind. {folio 29 a 2}
4005] Luid Gaidel cain conabuaid
iársain sechIndia sairthúaid,
corogab tir, torom ngle,
in-insi Deprofane.
4009] Luid ondindsi, erctais slúaig,
Deprofane sel siarthuaith,
bái 'nafichaib lín mbliadna
fonacrichaib Caspianda.
4013] Robaided ann, arim chert,
dodegdoinib fer n-Egept,
coic cét rig rán, regtai rainn,
immonn-ardrig, imForaind.
4017] Lin intsluaig cenmotha sin
nifitir nech an-árim:
nochinned forcachdine
arimbed ahilmile.
4021] Ri tarlaic Muir Romuir ruad
forForainn conamórsluag,
nitherna leo diatírib
cid oenfer dohilmilib.
4025] IArnandamnad, gnim glinni,

p.59

iarmarbad aprimgindi,
nicheil cech sui, srethaib slecht,
cosin rosmbái rosleicset.
Rosleicset dilmain uadaib.