Corpus of Electronic Texts Edition
Saltair na Rann (Author: Unknown)
poem 37
37.
3753] Robatar ann, cainig cain,
'coacáirib hitimmarcain,
in-immblib intsluaig comblait,
díingin inprimsacairt.
3757] Roraid friMoisi, mod nglan,
iarsain indaraingen:
p.55
'cid nacharcobrai, dín cert,
ahóclaig út ahEgept?
3761]
'Atarfail cenduine trén
arn-oenur in-etarlén,
immunn-usce n-uar, cachcruth,
ata inslúag icarsárgud.'
3765] Atraracht Moisi, mod ngle,
nipuhéirge meraige,
cotarat cobair trein trait
dohingenaib intsacairt.
3769] Rogartatar leo diataig
Moise amru cachn-armaig,
con-éicsitar ascéla
dian-athair cenimséna.
3773] In sacart sluinti gaissi
rofer failti friMoise,
aracruth, aracheil nglain,
arfortacht diaingenaib.
3777] Rofastai insacart iarsein
inaoentaid, in-oentreib,
iartimnu indríg, ruathar ndil,
dorat dó aprimingin.
3781] Hiclemnas intsacairt cenlén,
ifichaib slebi Coreb,
dorumalt Moisi, mod ngle,
ann tresraind aaimsire.
3785] Noemrí nime, nert cechsluaig,
coemcli cenbini bithbuaid,
ri betha borggaig cenbrath
rosnordaig feib robatar.
Robatar ann cainig cain.