Corpus of Electronic Texts Edition
Saltair na Rann (Author: Unknown)

poem 36

36.


3717] Cotranic lá forsinmaig
frioendiis icimsergáin,
indaranai diachlainn cheirt,
araili badoEgeipt. {folio 28 b 1}
3721] O shunn atgeoin, narbotrén,
infer dochlainn Israhél,
bahe ingnim garb cenchert,
romarb infer ahEgept.
3725] Rofitir intúath cogle
fer domarbad doMoise,
feib leir dorigned cocert
atchuas doaírrig Egept.
3729] Forfúacart Forainn cocert
forferaib amraib Egept,
nabeth dó dín innachdu
acht abas no ahinnarbu.
3733] Dodeochaid Moisi forfecht
forteched riasluag n-Egept,
iartírib, iarslicthib srath,
cofarnaic indingenrad.
3737] Cofuair slog mór forsinmaig
dogillaib isd'ingenaib,
icimmain chairech fosmacht
dochum topur istiprat.
3741] Ocdéne natrebthach tren
imslessaib slébe Coréb,
bamor angair forsinmaig
icdail usci diacairchaib.
3745] Dessid Moissi, bamod ngle,
forochair naconaire,
snimach, saethrach, bec anert,
aoenur, icsírimthecht.
3749] Moisi batrén incachdáil
dochiniud clainni Abráim,
nicheil ceol ngle ngnimrad nglicc,
is doréir De cotnic.
Cotnic la forsinmaig.