Corpus of Electronic Texts Edition
Saltair na Rann (Author: Unknown)
poem 35
35.
3693] Rogénair Moisi, mod ngle,
in-amsir natromdóire:
rolad, ciarbochain achruth,
ass hisruth Níl diabádud.
3697] Conafuair Termod, gnim cert,
ingen Forainn rig Egept,
'condsruth, icinnlat alám,
cainbe fial, forssaid, findnar.
3701] IArsin coforngart diamnaib
conotuctáis asintráig
inmac mbec incrotha glain,
uair dorat Dia foamenmain.
3705] Rodacar Termod iarsein
feib caras cách aoengein,
coron-erail, bacain glonn,
baforgo diadegaltrom.
3709] O shunn roalt combatrén,
diall friclaind mac n-Israhél,
dochuaid ifat fiadcachclaind,
narbomac d'ingin Foraind.
3713] ISsu cenlen, lúad nglanna,
cenathair trén talmanna,
forfailtig gnim gle cachthuir
'sindaimsir irogénair.
Rogénair Moisi, mod ngle