Corpus of Electronic Texts Edition
Saltair na Rann (Author: Unknown)
poem 29
29.
3225] Doarfas fís, foromm cert,
doForann, dorig Egept,
nifrith dó cosúidib srath,
diadrúidib nech dosfucad.
3229] Nifrith frigeirchert osmaig
Eigept conafortúathaib,
ecnaid no drui no súi snéid,
nech dosfucad coglanréid.
3233] Badebthach Foraind friathúaid
corogail rolaind rorúaid,{folio 27 a 2}fridruidib duithib cachtreib,
friasuidib, friaecnadeib.
3237] Batar fri sothochta serc
dácomalta icríg Egept,
sechcach fridálaib cachthreib
'nagradaib, 'nachomarleib.
3241] Friatoil togaig, friaig thaig,
'nachoraib, 'naglanchocráib,
indarafer d'Egept comblait,
araili glechert d'Affraic.
3245] Batar cenancess rochlos
'nachardess, 'nachomaltos,
babráthair máthar, mod ngle,
cechtarde dib diaraile.
3249] Gaid rí Affrici doib, delm n-óg,
combad tadchrethi dodergór,
feib sogabtais oscachrainn
acht coromarbtais Forainn.
3253] IArsain triallsat folaimm fair,
forForainn, forsinn-ardflaith,
indarafer feimdeth gail
arba d'Egept aathair.
3257] Infer aili d'Affraic áin
fricathslait cairi comlain,
tarmlaic acholainn fricath,
tarmmairt Forainn domarbad.
3261] Rohirgaibthi lasinrig,
rodirgnaithi fodimbrig,
fofuctha icachtaib cocían
isincarcair coIosíaph.
3265] Doarfas aislingthi dóib
'sindaidchisin fochetóir,
hicacht carcrach crimnach
[...]
basnimach amenmandrad.
3269] Ruc Ioseph doib congloir gle,
breith cóir foran-aslingthe:
feib baderb tarbaid triabrath
baamlaid rochomallad.
3273] 'IMmárach indarafer,
nibagrádach, crochfaider,
biad araili, slanaib síd,
ingrádaib icondardríg.'
3277] Bae inri, foglámaib gne,
dodálaib aaislingthe,
dondleo lerggach, nirmbai bin,
p.48
bafergach friadegdáinib.
3281] Atchúaid do int-óclach, gnim ngle:
'nabi forsnim th'aislinge:
ata 'sincharcair cenchess
duini t'apthaib tuaslaicfes.
3285] 'Fer ruc breith forfís, forruth,
forndís bámar icumriuch,
feib rotharngair achíall chain
issamlaid forcoemnacair.'
3289] IArsain tucad fograd cain
Ioseph án asincharcair,
fíadslúag Eigept, amra bainn,
combai ifrecnarcus Foraind.
3293] Roiarfacht Forainn fadein
dó fiadintslúag coglanléir:
'nirbatruag, innis doscel,
ciatuath duit no cíacenél?
3297]
Atchuaid Ioseph corath,
cofossad, coainmnitach:
'nicóir gó fiadríg congráin,
atúaid dam, acrích Cannáin.
3301] 'Nihed domthabair fograd,
m'athair bahúa doAbrám,
int-Abram adrann ochein,
nir'bunad fann doChalldéib.
3305] 'Ata hitarngeire ochéin,
sain, a Forainn conglanchéil!
bidlán de inbith bladmall, bán,
donDia dian-adrann Abrám.'
3309] 'Tarfas dam fis, fúaim n-amra,
romloisc gris ahetarba,
nech nosfuaslaiced, fuam cert,
nifuar d'intliuchtaib Egept.'
3313] 'Aisneid inn-aislingthi n-an,'
arIoseph alainn imnar,
'cluinem uait centris, centlas,
indfís cinnas dotarfas.'
3317] 'Andommarfas, ameic raith,
duitsiu dalfas cechmbithmaith,
diambera breith fír forsein
nibia díl forth' airmitein.'
3321] 'Bidbreth fír beratsa, aflaith,'
arsé, arIoseph inbithraith,
'gním gle friollblad cechcruth,
cendolbad, centuscurnud.'
3325] 'Secht mbai metha tarfas dam,
secht mbae caila, clú n-ingnad,
na secht mbae caela, clú gle,
duatar na secht mbae remrae.
3329] 'Secht punainn lána dográn,
secht punaind senga, saeb dál,
na secht senga, ba truag tra,
duatar na secht granmara.
3333] 'Cocúala inguth 'coarad rim,
cluinti, a Foraind nadandind,
{folio 27 b 1}ismor indrún, ruathar ngle,
fil ríathur it'aislingthe.
3337] 'Tabair domenmain cenbrath,
delgnaid docachintliuchtach,
bidlán bith fonelaib bla
doscelaib nafissisea.
3341] 'Diambera breth fíri fair,
forsinn-aislingthe n-ingnad,
indmass domuin dotrega,
dolúaig fein abithdoéra.'
3345] 'In fer foil beras breith ngle
cocoir forsinn-aislingthe,
cendoimme diss nambrig mbrass,
roinne ris doflathemnas.'
3349] Cor'faillsigder duit cenchess
int-aislingthe laind landes,
p.49
gnim cadla, agillai cengrain,
attaig Dia n-amra n-Abraim.
3353] 'Rotbia limm airmitiu intslóig,
rotbia grad, rotbia onóir,
mafíraid duit ácachcruth
indfissiu dofuaslucud.'
3357] 'Tuctar dam gremmann cencrád,'
arsé, arIoseph cosoergrad,
'feib tarngir dochomrad cloth
cocomlan diacomollud.'
3361] 'Rotbia lim greim Dé fodéin,
rotbia m'ordan coglanleir,
grian ocus esca 'mole,
muir istír, dru(ch)t isdathe.'
3365] Atchúaid Ioseph dó cogle,
doFor(ai)nn ahaislingge,
conadlumaib dluthaib dein,
iscorunaib riagaltaib.
3369] Macán Iacoib cosinrath,
bahé inliacoir lainn luágmar,
ósglaindírge 'nagnim cert,
rogab airrígi n-Egept.
3373] Int-aislinge luágmar, lín cert,
bahuathmar lasluag n-Egept:
amal teidm torainn atass,
físs doForaind doarfas.
Doarfas fís, foromm cert.