Corpus of Electronic Texts Edition
Saltair na Rann (Author: Unknown)
poem 28
28.
3165] Ri conoebi oscechthreib
rofaidi ríanabrathreib,
cengoe, cengaili, gnim cert,
combóe fodaire in-Egept.
3169] IArsain rorith, babúaid becht,
fritoisech ituaith Egept.
cachmaith buan combai dó ifus
dorat dó auagcommus.
3173] IArom rodacar aben39,
intigernai doruacel,
triaaslach n-imthach fochlith
dorimgart 'nacomlepaid.
3177] Roraid fria ingilla coglan:
'nihetragim dala ban,
ocus mé indaire centreóir,
m'oenur itirib anheoil.'
3181] Roradi fris inben blaith:
'natabair laim frim doraith:
aní dobiur duit amne
fail mor nech lasmadbuide.'
3185] 'Aben, bendacht fortgnúis nglain,
nachamluaid dot'baethbriatraib,
inhed bambeo, buaid ngelbda,
nifellub form'thigerna.'
3189] Roscrutai inben coleir,
uair naderna ingilla aréir,
forsinngilla nglan cenchol
cinnas doberad baegol.
3193] ISsed roscrutai inben baeth,
ónarabi ifus inlaech,
ingilla dothecht nachthan
le coseotu istech talman.
3197] 'Tair lim dodeiscin mosét
agillai, nihimmarbréc,
oslaic reom aglas dontaig,
aIoseph caem Cannanaig!
3201]
'A fir, tair remum istech,
narbamcrimnach comrairgnech,
uair nadigthim, fri set slán,
istech ndorcha m'oenurán.
3205] IArsain luid Ioseph istech,
nirb'anhumal imrisnech,
nifitir inmnai diabrath
combai iarcúl nacomlad.
3209] Huair forfemid uascachcruth,
iarnglerib, aóentagud,
doIoseph, bagnim n-etig,
imforbart fair forecin.
p.47
3213] Atrullai uaide immach,
assalamaib lomnachtach,
rohéige inben nert acind,
roscar friféle firthind.
3217] Tarraid ag fodoíre tróig
doIoseph án mac Iacoib,
achor hicarcair, gním ngann,
fosmachtaib inguforgall.
3221] Ardri búan betha broenaig,
connic buaid cach primoenaig,
cengaili arcli cotangaib,
ri conoibi oscachoentreib.
Rí conoebi oscechthreib.