Corpus of Electronic Texts Edition
Saltair na Rann (Author: Unknown)
poem 21
21.
2633] Ri rotidnacht bith mbuidech,
otha turcbail cofuined,
mainib maccraid, mo cachfiach,
dotrib maccaib meic Lamiach.
2637] Ri rodelb dreich domuin duinn,
roselb sreith sobáil saerdrúing,
rohuc cendith, fochucht chert,
acrich iarfut, iarlethet.
2641] Crich talman cechcruth imracht,
brig bladmar, bruthmar, breccbárc,
orían Deprofane anair
síar co colomnaib Herccail.
2645] A lethet, atuaid fades
diafethet buáid nadimchres,
oRiphi rigtreib imra
codithreib nan-Etheopda.
2649] Mori, nachdoimm diachlannaib,
raroinn itribrigrannaib,
{folio 25 b 2}roainmnig ingleochuaird glicc
Assia, Eoraip issAffricc.
2653] Ri dorat Eoraip nan-iath
dochlainn amra Iafiath,
cotuasciurt n-Assia triablait.
cosrethaib srotha Eofrait.
2657] Ri rothidnacht dochlainn Chaim
inn-Affraic n-uasail n-imslain,
cosin Romuir, ruathur cert,
p.39
eter Assia ocus hEgept.
2661] Saerchlann Sem diatarat Dia
primrann airegda Assia,
osruth n-Eofrait, nímtha sain,
cocricha airthir domuin.
2665] Coicmeic deec, digrais scel,
robatar laIafeth,
asecht fichet laSem slan,
iscuiciur laCam coemnar.
2669] Ciabeit fribrig mbladmair mbrais
indríg óstalmain telglais,
ferr cachrig rindbalcc nareth
ri doridnacht bith mbuidech.
Ri doridnacht bith mbuidech.