Corpus of Electronic Texts Edition
Saltair na Rann (Author: Unknown)
poem 17
17.
2513] Ri tharlaic sruthlind snamaig
dodilgenn clainni Adaim
acht oenchethrur fer namma,
ocus acethri óenmna.
2517] Ocus Enoc crabuid guir,
amal adfiad inscriptuir,
aoenur othuinn dothuinn,
amal cachn-ethait etruim.
2521] Snegdatar sruamma donim,
romebdatar triathalmain,
fortuili doib, tola ngle,
cethracha lá ocus aidche.
2525] Airdde nadilenn olar,
feib adfet scribenn cóemnar,
p.37
cuicprimchubait dec cencleith
rosiacht suas osnaslebib.
2529] Intan conscerthar cachndúil,
amal adfet inscriptúir,
ishe airet sain rosaig
lassar lái brátha brethaig.
2533] Donech robai imbethaid bi
dorosat Dia hicoemchrí,
dosrat indiliu fothracht
acht inrothecht indoenbarcc.
2537] Ri nimi nair, nassad nglé,
rí conic traig istuile,
ártuassi cachmbrig, cachmbrait,
huaisle cachri ri tarlaic.
Ri tharlaic sruthlinn snamaig.