Corpus of Electronic Texts Edition
Saltair na Rann (Author: Unknown)

poem 16

16.


2481] Ri roraidi friNoe nar:
'heirg isinn-ethar n-imslan,
tu isdothrimeic namma,
ocus forcethri cáinmna.'
2485] Percoba, cainiu cachfiach,
setig Noe meicc Lamhiach,
mna natrimac, monar ngle
Olla, Oliua, Oliuane.
2489] Sessiur doclainn, cain amíad,
batar icNoe mac Lamíach,
trimeicc mathi, milib lá,
ocus teora ingena.
2493] Sem saer asinser, sliucht ngle,
innaclainni cruthaige:
genatar fritindrem tlacht
ingen etercach n-oenmacc.
2497] Olla ben Sem, soer friaháil,
Oliua ben Chaim choemnáir,
Oliuana, baigthi treith,
asósser ben Iafeith.
2501] Ri dorimmart, nisluag suail,
inairc Noe foroenhuáir,
dineoch rothecht muir istir,
lanamain cachoenmil.
2505] Innán-adbaib, bág cenail,
ba sluag mor dolanamnaib,
conalóintib, lathar ngle,
isdiambiadaib techtaide.
2509] O rolínad indarc huag
robái indigal forimluad:
adfiadar fír, fo-rum ngle,
babriathar rig roraide.
Ri roraidi friNoe nar.