Part 4 of Saltair na Rann

Corpus of Electronic Texts Edition

Saltair na Rann (Author: Unknown)

poem 3

3.

657] Ri dorosat nanoingrad
nimi fricumtach coemnár,
foglanblad achrotha glain,
friaadrad, friaairmitin.
661] Trigrád doib, torainn glan,
asnessu dochum talman,
Angeli frisretha seis,
Archangeli, Uirtutes.
665] Potestates, oebind bla,
ithe trigraid medoncha,
Principatus, bag centreis,
ocus Dominationés.
669] Trigraid hisuachtarchom dib
ifrecnarcus indardríg,
Troni fririgsuide réil,
Hiruphin is Saraphein.
673] In dechmad grad, canar lib,
censechnad slan síl Adaim,
uasbith cenguasacht icrí
dodosruasat monaebrí.
677] Ri rochoimsig nagrada
cotoimsib cech degdána,
linib lianmag angnim cain,
frian-iarair, frian-airmitin.
681] Secht ngrad ann, airegda ingnim,
friasainsemla indardríg,
dogress doib, cenchithu cruth,
triabithu coaairfitiud.{folio 20 b 2}
685] Dagrad dib, derbdu dalaib,
fritorroma sil Adaim,
fricechcangin ngnathmair nglain,
Angil ocus Archangeil.
689] Angeil gléglana, gnim cert,

p.11

doreir Dé fritechtairecht,
indArchaingil cenchaire,
ithé nauasaltechtaire.
693] Uirtutes, nerta cechthan,
fridenam nafirt findglan,
Potestates, delbda atlacht,
atfebda frifollomnacht.
697] Principatus, blathi gne,
fríathi nangnim cinte,
Dominationes, nóebda cruth,
sluag soerda frismachtugud.
701] Troni, dichraidiu combrig,
fiadrigsuidiu indardrig,
hilar shircanait ceol ngleir
Hiruphin isSaraphein.
705] Crichid cenchrinhed inchlass
fochanat riched rindmass,
cliar gel formaig rind roalt
nacethrisen find fichet.
709] Nosfreccrat naslóig slana
doib conhettgat hilgrada,
conidhed canthus inslog
sanctus Deus Sabaóth.
713] Ri rofoilsig dam, deilm¹³ n-an,
ni dothoimsib nan-hilgrad,
diasostaib saidbrib sluagdaib,
dian-airbrib, dian-ilbuadaib.
717] Dodeccrai osbetha bann
srethaib ilretha rétlann,
caine már góo gréne,
connaibe fochomglére.
721] Diafebsai aidchi huimle,
diacennsai, diangnathchuibdi,
diacainduthracht cenchaire,
diandeeircc, diatrocaire.
725] Diaslaine, slicht cendochta,
dian-áne, dian-etrochta,
diacruth gle, coemda, glanna,
diangne noebda n-adamra.
729] Diasidaib, srethaib seolaib,
diangnímaib, dianglancheolaib,
diamodaib amraib aildib,
dian-aitdib, dian-ilarmib.
733] Arim nan-angel innim,
doreir arFiadat findgil,
fritaidbsigud, derb ndana,
iarfailsigud¹⁴ spírtalda.
737] Nihed an-airim, amorí,
lín acuire fochoemli,
acht madlin intsluaig atraig
icoemthecht cacharchaingi(l).
741] A hoen, adó, atrí trel,
ado friu conidcuicfer,
dacuiciur, iarngairib gle,
isshi indarim deichde.
745] Dadeich derba, torainn tricc,
tiagait hisincertfichit,
ocus trideich, triallait blait¹⁵,
issed tiagait hitrichait.
749] IArsintrichait, taidbret bí,
doaidbet imut arí,
cethrideich, iarslanaib smacht,
isi indárim cethrachat.
753] Coicdeich iarsreith sliucht fónait,
ised tiagait icoicait,
sedeich, cengairim, cenacht,
issed indárim sescat.
757] Secht ndeich hisechtmoga slan,
ocht ndeich ochtmoga ollmar,
nodeich innochait iarset,
ocus deich ndeich inglanchet.
761] Deichcet inmili, mod mór,

p.12

ocus deichmili inlegeón,
deichlegeon dogres cachdia,
issed tiagait hicuinia.
765] Deichcunia, coleir ciagléis,
issed tiagait inmarés,
deichmares, miad milib bla,
techtas coderb caterua.
769] Decim caterua rochlús
tíagait in-exercitús,
deichnexercitús, teanm tra,
tiagait coderb inturba.
773] Deichturba derb nandrong nden,
issed tiagait in-agmen,
deich n-aigmen angel gráid ngil
icoemthecht cacharchangil.
777] Fail secht n-archangliu innim
laruiri richid rindgil,
lacachn-archangel foleith
sechtdeich agmen doanglib.
781] IShésin innomad grad,
dorónad fornim noebnár,
angel ngleglan cenmennar
icoemthechtaib archangel.{folio 21 a 1}
785] Na ocht grad cenmothá sin,
dosrósat Dia coderbden,
acht mori rángle fornim
nifail roairme an-árim.
789] Tuirmem friagairm fiadrig recht
ainm na cethri fer find fichet,
drong duassach d'arbrib angel
nan-uasal, nan-archangel.
793] Gabriel, Michél, maith an-greim,
Raphiel, Panachel oebind,
Babichél, Raguel roclos,
Mirachel, Rumel rigdos.
797] Fafigial, Sumsagial slán,
Sarmichiel, Sarachel saergrád,
Uriel, Hermichel maith mass,
Sarachel, Barachel bladbras.
801] Lihigiel, Darachél cenchol,
Segiel, laSariel sairdron,
Lonachel, Arachél tan,
Stichiel, Gallichiel gleglan.
805] Guidem doib, derb dín cenmeth,
arinrig rodelb riched,
'mobethu cenchithu, cruth cain,
triabithu 'nambithoentaid.
809] Cibhe gabas cuit nói ngrad
etir iarmerge is tiugnar,
rodmbia nem, nassad ndangen,
imbithoentaid archangel.
813] Datrian insein, sluaig roclos,
robai innim rian-imarbos,
atrian huili, fotheidm thinn,
dochuatar dochum n-Iffirn.
817] Atethach, aChoimdiu cain,
domf'orcraid, dom'hessbadaib,
tabair dam dilgud hifus
dom'ainblib, dom'aneolaus.
821] Ciarobai doanble arád
airmi aidbli nan-ilgrád,
anroradius, sonad sír,
isdomolad mororíg.
825] Cianobeth cét tengad ndron
frisirlabra cenairchron,
níaisneidfind triabithsír
cétmad adamra m'ardríg.
829] Ardruiri búan betha bricc
doruirmi cachsluag sainglic,
arcli, arnduasach, arn-abb,
inrí huasal doruasat.
Ri dorósat nanoengrád.

p.13