Corpus of Electronic Texts Edition

Saltair na Rann (Author: Unknown)

p.1

Saltair na Rann

poem 1

1.

1. Moríse rí nime nair,
   cenhuabur, cenimmarbaig,
   dorósat domun dualach,
   morí bithbeo, bithbuadach.
   5] Ri osduilib thargca gréin,
   rí ósfudumnaib aicgéin,
   ri tess, tuaid, tíar ocus tair,
   fris níderntar immargail.
   9] Ri coruinib robai, fail,
   riandúilib, rian-aimseraib,
   rí bithbeo beus, blaith adenn,
   ri centossach, cenforcenn.
   13] Ri dorigne nem noithech,
   nihúaibrech, niimchloithech,
   ocus talam, tolaib tlacht,
   comtren, comfossaid, comnart.
   17] Ri dorigne sorcha saer
   ocus dorcha con-anaeb:
   indaranai islaithe lan,
   araile isadaig imlan.
   21] Ri rodelb tétadbul De
   dochetadbur nandule,
   .....s frisamla suthach
   inmass amra écruthach.
   25] Ri rodelb eisse cachnduil
   rosderb cengesse coemruin,
   eter mín isgarb condath,
   eter marb ocus beothach.
   29]
   Ri rothepi, bladmar, brass,
   asinchetadbar admas⁴,
   talam tromm toracht, delm chert
   dian'fonn fothacht fotlethet.
   33] Ri rochruthaig, nícuac cinte,
   hicuairt nafirmiminte,
   domun delbda derbda druing,
   mar ubull febda fircruind.
   37] Ri rodelb dluma iartain
   hura coderb imthalmain,
   rith roseim osbith, buaid ngle,
   indaeor uair uscide.
   41] Ri c(ria)thras usce n-an, n-úar
   foriathmass nan-al n-ollmuad,
   iarsrebaib cosesraib sruth
   iarmesraib comesrugud.
   45] Ri roordaig ocht ngaetha
   torgaib cenlocht lanaeba,
   cethri primgaetha cotngaib,
   cethri fogaetha feochrai.
   49] Cethri fogaetha aile,
   rádit auctair ergnaide,
   bidhi an-arim fírchert
   dogaethaib dagaeth deec.

   ---

   p.2

   
   53] Ri rodelb datha nangaeth
   rosderb frisratha slanaeb,
   iarclechtaib rith roratha (?),
   combrechtaib cachilldatha.
   57] Ingel, incorcarda glan,
   inglass, induaine allmar,
   inbuidi, inderg, derb dána,
   nisgaib fergg frisodála.
   61] Indub, indliath, indalad,
   intemen, inchiar chálad,
   indodar, doirchi datha,
   nidat soirchi sogabtha.
   65] Ri rosordaig oscachmaig
   na ocht fogaetha feochrai,
   rodelb cenditha, dín saeth,
   cricha nacethri primgaeth.
   69] Anair incorcra glanbda,
   andess ingel gle, amra,
   atuaid indub gailbech, grach,
   aniar indodur engach.
   73] Inderg, inbuidi 'male,
   eter gil ocus corcrai,
   indúani, inglass, croda (?) ⁵ lir,
   eter huidir isglegil.
   77] Indliath, inchiar, grainne anguir,
   eter huidir iscirduib,
   intemen, indalad tair,
   eter duib ocus corcair.
   81] Coir rocoraiged acruth,
   doronad an-orddugud,
   fogaessaib glessib cenchlith
   iarsessib, iarsuidigthib.
   85] Na da gaeth dec, tolaib tress,
   tair ocus tiar, tuaid istess,
   rii roscuibdig cotagaib,
   roscuibrig fo secht nglassaib.{folio 19 a 2}
   89] Ri dosnarbair iarsessaib
   imthalmain con-ilglessaib,
   cach digaeth dib imglés ngle
   isoengles foraib huile.
   93] Ri dosrat iarnglessaib clecht,
   iarmbessaib centarimthecht,
   indarahuair, blaith iarmblai,
   induair aile ainbthechae.
   97] Rí tadban tomus donleirg
   othalmain cofirmimint,
   fris domidet, met glanna,
   fritiget natalmanna.
   101] Rosuidig secht rinne reim
   ofirmimint cotalmain,
   Satuirn, Ioib, Mercuir, Mars,
   Sol, Uenir, Luna lánmas.
   105] Ri rorimi, rigda inbla,
   otha talmain coesca,
   semile fichet archet
   fordamidet 'naglanmét.
   109] IS hé sain int-aear huar
   linib haial friimluad,
   dianidainm triallach, derb tra,
   annem niabach n-airerda.
   113] Indrae ohescgu cogrein
   ri rorím congle glanleir,
   dacet mile, mor insmacht,
   latri cethair cethrachat.
   117] ISse sin int-ethier huais
   cengaeth, cenaear n-angluais,
   dianidainm, cen balba mbla,
   innem n-amra n-etherda.
   121] Trichutrumma, intsain doleir,
   eter firmimint isgrein,
   morí rindbalcc, rofír sein,

   ---

   p.3

   dorindnacht dorimirib.
   125] IS hisin indOlimp huag,
   cenchumscugud, cenimluad,
   iarsliucht saer nasruthe sen,
   dianidainm intresnoebnem.
   129] Damile déc, torainn ngle,
   archoiccétaib déc mile,
   cain rith rindrethait insain
   ofirmimint cotalmain.
   133] Met naré, ruathar cint,
   othalmain cofirmimint,
   isse inmet sain, srethaib srath,
   ofirmimint coriched.
   137] Cethrimili fichet sain
   artrichait cet domilib
   oshunn coriched, reim n-oll,
   cenmotha firmamentom.
   141] A met na ree sein uile
   othalmain corigsuide,
   issed fil othalmain tinn
   sís cofudomnaib Iffirn.
   145] Rí cachthuir thuathaig, dein, deirg,
   rofuathaig fein firmiment,
   feib baderb laiss oscach maig
   rosdelb donmaiss ecruthaig.
   149] Ri nan-uile n-adbar n-án,
   arm-buili bladmar bithmár,
   inglóruill cocessair chain
   dosrorainn icoiccressaib.
   153] Incuiced criss guires chness
   morí ruithes triasirthes,
   frisasad sluagda saigthe
   dahuarda imdamesraigthe.
   157] Huarda andess isuarda atuaid,
   indamesraigthe, ismórbuaid,
   incriss tessaigthe, isderb de,
   eter nada mesraigthe.
   161] Rí targcai cech ruirig reil
   rosuidig smachtai fouagreir,
   rodagni cenchétlud ngle
   dochetchruth nafirmiminte.
   165] Amal bis abloesc immog
   acht noslui línib hilchor,
   fial nafirmiminti imbith
   tria bithu forabithrith.
   169] 'Macuaird focheird atoimsi,
   iarsreith suairc fri sirsoillsi,
   isannsu infomus 'moa mbeir,
   ni triit tarsnu toimsideir.
   173] Rorannad iarn-intliucht fail,
   feib rodelgnaisset auctair,
   dasebratta fochis chain,
   dasé phairt 'nan-irchomair.
   177] Huide mís dogrein cachphairt,
   iarseis nan-ugtar n-ardaitt,
   forith hinathur⁶(?) gluair ngle,
   cech mbliadain dosstimchellae.
   181] Hisindfirmimint cogle
   sesca dáse senistre,
   dothaitni fridia 'malle
   cachphairti se senistre.
   185] Ata iarrúini indrig reil
   rodelb duine ::: huagreir,
   fodluthad, cendolma ndein,
   comla forcach senisteir.{folio 19 b 1}
   189] Trénbrat demin, torom n-án,
   marbad gemen coem comlán,
   tuinech torachta rosrig
   imthalmain contib immib.
   193] IM thrínimi ata centair
   trinimi impe, hit himsláin

   ---

   p.4

   insechtmad nem, isse sein
   rochertad eternimib.
   197] Ni sossad suaircc slóig aingel
   acht iscuairt chóir coemdaingen,
   amalbis rothmol forluth
   triabithu forbithimputh.
   201] Infirmimint, ilar mbla,
   isnasechtrind airegda,
   ata foroenrith, gluair ngle,
   otha inn-uair rocruthaigthe.
   205] Ri rorann ruandath osleirg
   nifualrad fann firmimeint,
   srethaib samlaib, slemnaib slecht,
   indibrannaib derbdai déc.
   209] Ri oscachairm, oscachdinn,
   dorat ainm forcachn-oenrinn,
   nimennair iarndligud dlecht
   donadibrennaib deec.
   213] Fuath cachrenna, ruathur ngle,
   itimchuairt firmiminte,
   feib rosderbait delgnaid
   [...]
   
   ishuandelbaib ainmnigter.
   217] Aquair, Pisc, Ariet, Tauir treb,
   Geimin choir ocus Cancer,
   Leo, Uirgo, Libru, Scoirp scrus,
   Saigitair, Capricornus.
   221] Ri corúnaib roscoraig
   innanndlumaib dermoraib,
   sreith nasliab, oscachblai,
   frisreith grian ocus escai.
   225] Tricha lathi, lórda ⁷ luad,
   ladech n- úara ocus lethuar,
   cotriall trechess oscachdind
   rethess grian incachoenrind.
   229] In grian suairc, iarn-urd riagla,
   forcuairt cacha oenbliadna,
   hi quindecim kalde, cain dind, issann téit incachn-oenrind.
   233] Grian in-Aquair, hed centáir,
   doróined im-mis Enáir,
   ocus hiPisc
   [...]
   cogle
   dorimther im-mis Febrae.
   237] Grian in-Ariet, aurdaircc dí,
   dothadbat im-mis Martíi,
   ocus hiTauir grian diareir
   dothaitni im-mís Apréil.
   241] Grian hinGemin im-mis Máii
   isdemin, ni imarchlái,
   nochochiuin guires cachtreib
   im-mis Iúin grían iCanceir.
   245] IM-mís Iuil ingrian il-Leo,
   issann ferass alangleo,
   teit grian adenus friatuisc
   inUirginum ⁸ in-Auguist.
   249] Dothaitni grian fhiadcachdrung
   iSeptimber inLibrum,
   grian nodafoilcc nochosceil
   iScoirp im-mis Ochtimbeir.
   253] In Sagitarium grian dosfeim
   oscachrian inNouimbeir,
   inDecimber, ischian clú,
   bidgrian inCapricornú.
   257] Athe sein indaserind
   dosrosat Fiadu forfinn,
   oscachrian rethait fonmbith
   riu reithes grian alanrith.
   261] A coic cachlae d'fiss cenbrath
   dlegair docachintliuchtach,
   docachoen, cengláma gné,
   bis fograda ecailse.
   265] Laa mis grene, ésca aes,
   rith mara cen immarbáes,

   ---

   p.5

   
   laa sechtmaine, feili noeb n-uag,
   iarcertglaine con-imluad.
   269] Ri rosrethaig, sróenaib slamm,
   dorethaib roenaib retlann,
   feib nosairbrig osrannaib
   rosanmnig dian-anmannaib.
   273] Cid caem lenn inleth fail frinn
   firmiminti nan-ilrind,
   inleth aili, lith cengeis,
   nocon-eitchiu ciachemmeis.
   277] Ri rogni clichis cenmeirg
   iarnafithis firmimeint,
   comfocus tadbain adreich
   imthalmain docachoenleith.
   281] Ri rodelb firmimint fír
   conarennaib cendimbrig,
   immontalmain, cengoi ngle,
   imsoi ontrath coaraile.
   285] Ri dorigni muirlinn mair
   osanfirmimint imslain,
   inmuirlinn aili isi inmuir,
   fordasniada imthalmain.{folio 19 b 2}
   289] Ri reil dorairngert cachfáith
   coimdiu cumtaig cachcoemgraid,
   dorosait grein crotha glain,
   forosna nem imthalmain.
   293] Ri dorigni esca n-án
   ocus indfairrgge imslán,
   foriaguil dosrona inrí,
   condatcora, comchuibdi.
   297] Sessed rann domuin cechdú
   hissi meit fil in-escu,
   ocus isingréin coglan
   sé commet dec intalman.
   301] Ri dorigne ilar mil
   fondfairrce ndermair ndírím,
   nithadbann nech acht mori
   an-anmann nach an-airmi.
   305] Ri dorigni sreba sluag
   donahénaib friimluad,
   doaltaib isnaslebib,
   dograigib formagreidib.
   309] Hilerda nan-anman n-án
   is nan-ildelbda ndermár,
   nifail hicrí rimess sin
   acht mad inrí donoebnim.
   313] Ri dorigne aéar n-uar,
   ocus tene reil rorúad,
   ocus talam bladmar, brass,
   ocus sruth raglan rethess.
   317] Ri rosil talmain iartain
   dolubaib, dofidbadaib:
   lan indomun diambolud,
   con-immad an-iltorud.
   321] Ri conic huacht ocus tess,
   mori firen frim'firless,
   ishe rosuidig cachseis,
   ri centuirim, cenaisnéis.
   325] Inrí reil narun corath
   doarfaid dún cachn-ingnad,
   diathuicsin treothu, din ngle,
   is trialin amirbaile.
   329] Ri rogni cachnduil foleith,
   aicseid ocus nemaicseid,
   acht inri rodelba sain
   nifail nach rí fortalmain.
   333] Nifail dodainib daingnib,
   doainglib na harchainglib,
   nech thucas triadindchur de,
   na fail d'ingnud ⁹ lam'rigse,
   Moríse ri nime náir¹⁰.

---

p.6