Corpus of Electronic Texts Edition
Betha Brigte (Author: Unknown)

section 53

O da-chuaid tra clú Brígte fo Eirinn uli i fertaib & i mírbuilib. Tancatar da dháll do Bretnaib & mac bec clam leo dia n-ícc co Brigit. & do-chuatar a munigin epscuip Mel imman ícc. At-bert Brigit: ‘Biat a muig co léic co roisc (?) in celebrad.’ At-bertsat na Bretnaig aris, deinmmnetach inna dóine-sin: ‘Ro h-íccais dóine dot chenél fén indé cen co n-ícca sinde indiu.’ Do-rigne Brigit ernaigthi & ro h-ictha a triur fo chétoir.