Luid Brigit & araile óga immalle fria do gabáil challe co h-epscop Mel i Telcha Mide. Ba fáilid-side friu. Anais Brigit ar umaloit co m-bad iside dédinach forsa tibertha calle. At-racht columu tenntide dia cind co cleithe na h-eclaisi. Ro iarfaig epscop Mel: ‘Cia h-óg suut?’ Ro frecair Mac Caille: ‘Brigit sin’, or se. ‘Tair a noem Brigit co ro séntar caille fort chend rasna h-ogu aile’, or escop Mél.