Do-riacht tra Mo Laga go Cluain Mic Nóis iar sin & ro-chualatar Fir Muighe anní-sin & do-chuattar a firu ara chenn et ro ghealsat comhadha móra dó et ni tainic leó et do-chuatar a macaimh & ni tainic leó et do-chuatar a mna iar sin et nochtait a cíche fris & ro ghabhsat-sein forra gach ní ro geallsat na buidhne rompa do comhall & a c-cuid féin .i. sgrepall gach aén-duine gacha bliadhna et caoga bó a c-coitcennus uaithibh uile le taobh almsan et duthracht cena amail ass-bert an file:
Do-deochaid tra Mo Laga lasna mnaibh & tangattar Fir Muighi uile ina comhdail go Tulaigh Mín & ro ghabhsat do laimh gach ní ro gheallsat féin & a macaimh & a mná do chomall fri Mo Laga & fria comharbaibh do grés tara éissi.
- Dlighidh Mo Laga d' Feraibh Muighe
mine riaghla
caecca bo bith-bliocht bána
gacha bliadhna.