Sléchtaidh tra Cúi Gan Mathair do Mo Laga iar sin & do-bert almsana dó .i. a dá each & a erradh & cuach lán d' arccat & mías óir thairis & dealg lán-eccoir & seisrech gacha bliadhna & airmitti anmcharat righ Muman do grés for a comharba & caingen a cluicc do denamh ria gach clog acht clocc Pattraicc. Geallais immorro Mo Laga nemh tar cenn a comhaill-sin do ghrés da gach righ no gebhadh Caisel go brath & gan dul d' écc gan anmchairdes fair tria rath Mo Laga.