Corpus of Electronic Texts Edition

The Metrical Dindshenchas (Author: Unknown)

poem/story 62

BRÍ LÉITH

1. Mebuir lemm aní dia fail
   senchas Brí Léith meic Celtchair
   ocus díach na slúag-bann slan
   for Líath Cúalann na comdál.
2. Líath mac Celtchair Chúalann chóir
   carais ingin Midir móir,
   Brí brúach-bricc búadaig co m-blaid:
   nídusráinic mac Celtchair.
3. Ní baí bad chaíme 'na ré
   bad saíre, bad súlchaire:
   cor' char in didil nár duí
   ingin Midir maic Induí.
4. Cechaing 'na báig Brí in ben
   'na dáil co lín a h-ingen,
   co ríacht Temraig na tríath tair
   d' fháilti fri Líath mac Celtchair.
5. Ní arrlaic Midir Mide
   in Líath dochum a thige
   acht roscaíl in tríath co taí
   in Líath ocus in láech-mnaí.
6. Iarsin dochúaid 'na congaib
   ingen Midir mór-glonnaig,
   co n-érbailt co téith iar tain
   túaid i mBrí Léith meic Celtchair.
7. ‘Cen co foam, clú cen geis,’
   ‘mise ocus tú, a Brí co m-breis,’
   ‘bid h-é do chomainm tréith tall’
   ‘Brí Léith meic Celtchair Chualann.’
8. Rop h-é sin a athesc ard
   in Léith lúaides cach láech-bard
   fri Brí m-brúach-bricc riana scur
   labrad lúath-glicc lán-mebur. M.

---

p.230