Corpus of Electronic Texts Edition
The Metrical Dindshenchas (Author: Unknown)

poem/story 58

LECC THOLLCHIND

  1. Lecc Thollchind, túachail in t-ainm,
    ós brúachaib mara mid-gairb,
    is eól dam cen chleith cubaid
    a senchas, feith, fír-bunaid.
  2. Tollchend, drúth Echdach ria ail
    meic Énna chrúaid Cheindselaig,
    and rotraserad in drúth dían,
    dia rascrad fri lúth láech-Níall.
  3. Airm i torchair féin in fer
    la muintir Néill, nár Gáedel,
    rotescad de co tenn tall
    a chend ocus a chathbarr.
  4. Ba gláeta in cathbarr calad
    imon cend cíar cath-labar
    co ríacht frisium slúaig athlaim
    dia brisiud, dia búan-scarthain.
  5. Roféimdetar uile n-oll
    ní don chind nó don chathbarr
    ara chúartaib ni chelid,
    do thúarcain ná trom-thenid.
  6. ‘Cuirther 'sin muir fo tháth tess’
    ‘in cend,’ ar cách co comdess,
    ‘ar atá do shaidbre ar slúaig:’
    ‘is í-seo ar n-airle in óen-úair.’
  7. Iarsin cuirther i muir mall
    in cend cíar isin chathbarr
    co ticht do cach thuinn, nár thé,
    cosin licc luimm lúaidmit-ne.

    8. p.224

  8. Noí tuill isin chind, ba col,
    tuill a chlúas, tuill a óol,
    tuill srón ocus súil ngér nglass,
    toll fo brón a bél bith-brass.
  9. Ó dofuc cach tonn, nár thé,
    in cend lond mar lúath-blede,
    ail forsn-dessid a thairm tricc
    rolen a ainm in aird-licc. L.