Corpus of Electronic Texts Edition

The Metrical Dindshenchas (Author: Unknown)

poem/story 49

ODRAS

1. Odras, úais ind ingen,
   fris' indlem laíd lúaidme,
   Odornatan airme
   meic Laidne meic Lúaidre.
2. Ban-briugaid ba brígach
   in gnímach glan gúasach,
   céile cáem co cruthacht
   do Buchatt balcc búasach.
3. Bóaire cáid Cormaic
   co roblait in Buchatt,
   dúiscid búar co m-blaitne
   cach maitne for muchacht.
4. Fechtus luid dia ésse
   a ben glésse gasta,
   Odras rúad co romét,
   do chomét búar m-blasta.
5. Moch dia m-boí 'na codlud
   Odras groc-dub gnóach,
   dosrocht ben in Dagda,
   ba samla día sóach.

---

p.198

6. Tuc léi tarb in tnúthach,
   in rígan garb gnáthach,
   baí i Líathmuine láthach,
   in fíachaire fáthach.
7. Dairis boin in búaball,
   tarb túamann 'nar taídenn,
   ó Themraig tric táraill
   co Slemnaib Fraích Oírenn.
8. Slemon ainm in tairb-sin,
   dremon in dóel donn-sin:
   a ainm, mer cen mebsain,
   'sed rolen in fonn-sin.
9. Luid co Crúachain cróda
   iarsind úath-blaid ágda
   in Mórrígan mórda,
   ba slóg-dírmach sámda.
10. Luid Odras 'na h-iarn-gait,
    iarmairt nárbu ada,
    's a gilla dúr dorthain,
    torchair i Cúil Chada.
11. Cada ainm a gilla
    rofinna mór fíche:
    ruc Odras, úair áithe,
    for lurg a búair bíthe.
12. Iarsin, d' éis a gilla,
    luid in ben gléis glanda
    co Síd Crúachan cumma,
    co fríth úath-blad alla.
13. Roléic cotlud chuicce
    in groc-dub cen glicce
    i nDaire úar Fhálgud
    dia fúair sárgud sicce.

---

p.200

14. Dosruacht ina tathum,
    trúag tachur for tulaig,
    in Mórrígan úathmar
    a h-úaim Chrúachan cubaid.
15. Rochan fuirre ind agda
    tria luinde cen logda
    cach bricht dían, ba dalbda,
    fri Slíab mBadbgna m-brogda.
16. Legais in ben brígach
    fri Segais, sreb súanach,
    mar cach linn cen líg-blad:
    nísbaí brígrad búadach.
17. Don tshruthán fháen fhoglas
    is ainm sáer co soblas,
    luid ón mnaí thrúaig thadaill
    cosin abainn Odras. O.