Corpus of Electronic Texts Edition
The Metrical Dindshenchas (Author: Unknown)

poem/story 38

ODBA

  1. Sund rohadnacht Odba úais,
    omna co crúais, carad gaís:
    druimm ria gall-echaib rognáis
    cuing tláis, úa Ballethain baís.
  2. Mac Blai Ballethain ón Brí
    Odba na chrí romar-cloí,
    in dub dét-bladach, nír duí,
    oc Cunn chét-chathach diamboí.

  3. p.176

  4. Ba muccaid menmnach ria mess
    in dún dígna, degrach doss,
    fer co solma in slúag-thend sess,
    Odba, oisces úan-chend oss.
  5. Airm in' rohailed a úag,
    mór slúag dianid airer án:
    na slóig dia m-bá-som cen brón
    cóir cía thá-som ara lár.
  6. A ainm amlaid, ós cach all,
    rolen tall don talmain trumm:
    Odba ass co n-ilar glonn
    nírb idan sonn roslass sund. S.
  7. Odba, ben Héremóin, and,
    tall 'na glé-medóin h-i crunn:
    máthair a macc, in maith mall,
    int app thall rostatlaig sund. S.