Corpus of Electronic Texts Edition
The Metrical Dindshenchas (Author: Unknown)

poem/story 36

SLIAB CALLANN

  1. Is eól dam aní dia fail
    ainm sléibe Callann cobsaid:
    Callann ria gairm, cen chor de,
    ainm in chon roboí ac Buide.
  2. Buide mac Báin, ba búaid fir,
    roalt coin crúaid 'na cháem-thig,
    cú co romét ós ralaig,
    do chomét a cháem-fhalaid.
  3. Dáel-chú Celtchair, crúaid a chor,
    ba h-é thúaid athair in chon:
    and fríth in Dáel, nárbo dis,
    hi cloccunn cháel Chonganchnis.
  4. Bátar trí coin ina chind
    Conganchnis, caíme ar cach dind:
    brec, dub, odar, tes a tlacht,
    cirrset mór cnes in chonart.
  5. Cú maic Dá Thó, rothuill troit,
    cú na cerda fo chomnoit,
    in cú roboí ac Celtchar chóem,
    ropo rechtmar in ro-Dáel.
  6. In cú roboí ac Buide búan,
    cuilén don Dáel ón donn-chúan,
    ba comga cethra ocus cruid.
    co laithe debtha in Duind duib.
  7. Dond dub Cúalnge, dígrais dó,
    conort Callann i crú-chró,
    co fil sund 'sin tshléib a mart:
    aige do chéin rocomacht.

    8. p.172

  8. Is don sceól sin, is fír dam,
    fil Slíab Callann na comram:
    fert Callann h-i fót fo fheór
    dam ósin rót is roeól. Is.