Part 34 of The Metrical Dindshenchas

TALTIU

CÚÁN ÚA LOTHCHÁIN cecinit

A chóemu críche Cuind chain
éitsid bic ar bennachtain;
co n-écius duíb senchas sen.
suidigthe óenaig Thalten.
Trí chét blíadan, fodagaib,
teora blíadna do blíadnaib
co gein Críst, coistid rissein,
ón chét-óenuch i Taltein.
Taltiu ingen Magmóir maill,
ben Echach gairb maic Dúach daill,
tánic sund ria slúag Fer mBolg
co Caill Cúan iar cath chomard.

Caill Chúan, ropo chlethchor crand
ó Escir co h-Áth nDrommann,
ó Mónai Móir, mét n-uide,
ó Shéil co h-Ard n-Assuide.
Assuide, in suide selgga,
fris'ndáiltis daim drom-dergga,
gnáth cend carbaig a caill sair,
in athbéim for brú Chlochair.
Commur, Currech, Crích Linni,
Ard Manai i m-bítis rindi,
batir coscraig coin Chairpre
for tír Tiprat Mungairde.
Mór in mod dorigned sin
al-los túagi la Taltin
athnúd achaid don chaill chóir
la Taltin ingin Magmóir.
Ó thopacht aicce in chaill chain
cona frémaib as talmain,
ria cind blíadna ba Bregmag,
ba mag scothach scoth-shemrach.
Scaílis a cride 'na curp
iarna rige fo ríg-brutt;
fír nach follán gnúis fri gúal,
ní ar fheda ná fhid-úal.
Fota a cuma, fota a cur
i tám Thalten iar trom-thur;
dollotar fir, diamboí i cacht,
inse h-Érend fria h-edacht.

Roráid-si riu 'na galur,
ciarb énairt nírb amlabur,
ara n-derntais, díchra in mod,
cluiche caíntech dia caíniod.
Im kalaind Auguist atbath,
día lúain, Loga Lugnasad;
imman lecht ón lúan ille
prím-óenach h-Erend áine.
Dorairngert fáitsine fír
Taltiu tóeb-gel ina tír,
airet nosfaímad cech flaith
ná biad h-Ériu cen óg-naith.
Óenach co n-ór, co n-argut,
co cluichib, co ceól charput,
co cumtuch cuirp is anma
iar neólus iar n-erlabra.
Óenach cen guin, cen gait neich,
cen cheist, cen changin, cen chreich,
cen chron, cen aidbriud. cen dáil,
cen élúd, cen ergabáil.
Oenach cen chol, cen chelggad,
cen aithis, cen imderggad,
cen imchosnom, cen ellach,
cen táide, cen taithchennach:
Cen techt fer i forud m-ban,
cen mná i forud fer find-glan.
acht cách fria chárus ó thaig
inna árus ard-óenaig.

Óen-chairdde in óenaig andsin
etir h-Érinn is Albain,
ic techt ind, ic tuidecht ass,
cen nach n-ecraitius n-amnas.
Ith ocus blicht for cach dind,
síd ocus soinenn dia chind,
doratad do gentib Gréc
ar fhírinne do chomét.
Ó chaíniud Talten din tShéil
co flaith Lóegaire maic Néil
dogníthe la slúag síabra
óenach cacha h-óen-blíadna,
La Firu Bolg, bátar and,
is la Túatha Dé Danann,
la maccu Míled iarsin
co Pátric iar prím-chreitim.
Atbert Pátric, ‘Ba búadach,’
‘in recht aicnid imúallach:’
‘cen cop ar Dia dorónad’
‘boí in Coimdiu 'ca chommórad.’
Co tánic Pátric iar Críst
óenach Talten, tróeta tríst,
mór marb rochaín a chéile
hi relic na rath-Fhéine.
Fert óen-doruis d'fhir co n-aí;
fert co n-díb dorsib for mnaí;
ferta cen dorsi drena
for maccu, for ingena.
Aisneis do chorthib fert fadb,
fulang caindel d' airi marb;
cnuicc for allmarchaib ánaib
ocus múir for mór-phlágaib.

Maraid múr Tailten cech than,
in' rohadnacht ilar m-ban,
ocus múr foluig mór marb,
in' rohadnacht Eochu garb.
For múr Echach úaigthe clach
fiche forud ríg Temrach;
ocus for múr mín a mná
fiche forud a rígna.
Ríg-imscing don Mumain múaid
fri rígu Temrach atúaid;
teora Connacht, cen nach cacht,
for forud fer n-Ólnecmacht.
Láechrad Lagen, lór do blad,
eturru is cóiced Ulad;
innisem don leith andes:
Ériu, dia ríg ba ruidles,
Ulaid ria cretim cruiche
co carptib don chét-chluiche;
Lagin ria firu Muman,
Connachta h-i lurgg lán-chuman.
Lia Gruip, lia Gair, lia lobur,
lia in chlaim i tóeb na forud,
clocha ríme, roth Fáil Flaind,
coirthe Colmáin, carn Conaill.
Geiss di urchur ná geib greim,
geiss di tochira cen tairlim,
geiss oc dul úadi do phraind
a déscin tar clé-gúalainn.

Céti tri deccra rostecht;
fer cen chend fair 'ca imthecht,
mac meic secht m-blíadan for meór,
táim in tshacairt dind aeór.
Na teora fogla filte
asrogart Pátric innte,
gait dam ar chuing, guin bó m-blicht,
loscud lés fás, ní prím-shlicht.
Pátric pritchais, conid breth,
nad gébad síd nech doneth,
céin bes Tailtiu cech thrátha,
céin marait a ríg-rátha.
Ráith airthir, ráith íarthair uilc,
ráith Lugdach, ráith Lort, ráith Luirc,
ráith Chon, ráith Chanand, mochen,
ráith síl Taidcg, tredua Talten.
Tredua Talten sech cech tír,
áitt i troiscitis na ríg,
láechaib, clérchib, cétaib cenn,
na tísad teidm tír n-Érenn.
Hi tredua Thalten, im theirt,
rosnír Ísu do Mac Eirc
na teora plága do breith
a h-Érinn, ní h-anaichnid.
In giallcherd co n-daigthe immach,
bádud na m-barc ar Bregmag,
mortlaid mac nÆda Sláine,
do Mac Eirc ní h-imnáire.

Cíambad termond Tailtiu ar thrét
tuc Dia cairde dia chomét,
Pátric, Brigit, Becán bán,
Mac Eirc, Eithni, Adamnán.
Imráidem a tánic de
iar creitim na Trinóite;
trena Tailten, tuir théite
oc promad na fían-chéite.
Fir ar dún ar tús da tríall;
fir eter da n-dún 'na n-díad;
fir iar n-dún dénma ossaid:
at eat na trí prím-thossaig.
Pátric, fortgella cech rí
iar tochim Thalten fo thrí,
Mac Eirc, Ciarán Cairn don maig,
at eat na trí comallaig.
Cóic cét óenach immosech,
cid cintech ar écintech,
ó óenuch Pátric Macha
co dub-óenach nDondchada.
Dá fhichet ríg rodaacht,
la cethrur ríg doridnacht,
ó Níall uile ind rígrad rán
acht Ailill a óenurán.
Óen rí ó Lóegaire ille,
óen rí ó cheniul Chairpre,
noí flaithe síl Aéda áin,
secht flaithe clainne Colmáin.
Sé ríg déc ar Mide amach,
ó Eogan issin óenach,
ocus deich ríg, doríacht so
a crích Conaill, a chóemo. A.

Cethri fichit, is fír sain,
do blíadnaib acht óen blíadain,
taichniud Tailten, tróg a fot,
céte Cormaic cen charpot.
Conostánic 'na chath chass
mac meic ind ríg mothar-mass,
ocus mac domeil mid mesc
ingine ind ríg dodrairmesc.
Rí Temra, togaide de,
Maelsechlainn Slemna slane,
sruth n-Eufrait eirge i n-ardda
oen-milid na h-Eorapa.
Orddan íarthair domuin duind
dam chobair, Cormac úa Cuind,
chucund i forud flatha
do chlaind Domnaill Dondchada.
Tuc gort Gáedel a gábud,
tuc h-Érinn a h-erbádud,
tuc óenach Talten a feór,
cíarb atharda, rop aneól.
Bec leis a tard dún do maith,
bec leis d' ith de bliucht de braich,
bec leis de sheót de bíud de brut,
bec leis de ór de argut.
Bec leis cacha lúaid diar les,
bec leis d' iasc do mil do mess,
bec leis dúnn ri cond crúaiche
óenach cecha h-óen-túaithe.
Bec lais caithmít den bith búan,
bec leis rígad cech fir úan,
bec leis cach lucht lán fonlen
conontuc d' óenuch Thalten.

Duthragair, ria techt anonn
cia bad fota ar saegul sund,
co nantartad h-i tech nDé
iar cinned a chomairle.
Críst la Máelsechlainn na súad,
Críst leis ar dothech ar dúad,
Críst leis ar chocad ar chath,
dia chomge dia chommórad.
Ríg ná tairnechtar ar n-dáil
ní dlegat ar n-imgabáil,
Máelrúanaid, Flaithbertach, Fland,
Áed, Cathal, Dondchad, Domnall.
Duthrachta uí Lothchain láin
duíbsi, a ócu ind óenaig áin;
mo báide iar sonad so
cían bas chomad, a chóemo.