Corpus of Electronic Texts Edition
The Metrical Dindshenchas (Author: Unknown)
poem/story 25
CARRAIC LETHDERG
- Lethderg, taidbritis ar tuir,
ingen chadla Chonchobuir,
doreilic seirc, deilm nád gó,
do Fhothaid i n-aislingeo.
- Anmann na fer, fichtib gal,
bátar mar óen ri Fothad,
feochra in challait as cach ceird,
rucsat don charraic Lethdeirg. L.
p.122
- Fethlenn mac Fidruí co feirg,
Lurgu mac Lúaith lasar-deirg,
fer nárb imrullach dia shleig
Irnisech mac Inmaisig.
- Corr Derce, dag-rí fri tress,
do Fhothud dogní ard-less:
romúin eólas, erctha tuir,
co Tromda mac Calatruim.
- Tromda in tráth ropo thrú:
ní gart cailech, ní gart cú,
tan ránic Fothad ri feirg
tuc cend in laích la Lethdeirg. L.
- Briccem mac Tuinde, toirm nglan,
gliccem doruilli ethar
do Fhothud fri fallait ferg
don charraic imboí Lethderg. L.