Corpus of Electronic Texts Edition
The Metrical Dindshenchas (Author: Unknown)
poem/story 19
BENN FOIBNE
- Eól dam co soirbi sercaig
Benn Foibni maic Thairceltair,
in fáth dia fail, gairm cen acht,
a h-ainm is a h-iarmoracht.
- Ba nia nochráided cuire,
ba dáilem, ba deogbaire,
Foibne, feochair in fethal,
oc Eochaid ard alt-lethan.
p.88
- Dorigni gním n-dedgair n-dúr,
romid 'na menmain mírún:
nírb imfhann i Temraig thair,
diar' marb Illand mac n-Erclaim.
- Fer láma ríg Themra thair
Illand ergna mac Erclaim:
Erclam mac Doithre géir guirm,
flaith na soichle a sléib Moduirn.
- Doluid reime ar fut Breg m-balc:
rolen cách dia thetarracht:
dar cach m-beinn fuair a fheithim:
nírbo greimm in gnó-theichid.
- Fergna, fer gaí lethain láin,
fer co srethaib, co sáer-báig,
rolen cen táth as cach thur
co ruc ós chách a choscur.
- Rogab a eill co h-arnaid
co Beinn Foibni imadbail,
co torchair in dáilem diss
la Fergna n-áir-mer n-úair-chiss.
- Fail a ainm cen doilgi ar daig
ar Beinn Fhoibni il-bladaig:
don gním roscaíles im sceól
cía romaídes, is mór-eól. Eól.
- A Ísu, sínes cech sín,
nímthí mímes ná mígním:
a choimsid 'fhind-bailc na fras
tindlaicc dom aíb is eólas. Eól.
p.90