Corpus of Electronic Texts Edition
The Metrical Dindshenchas (Author: Unknown)

poem 27

Ath Fadat II

  1. Líath Lurgan lúam gaiscid géir
    robói sund ó shléib do shléib,
    trén-fher d' úib Falgi na fled,
    nosfémded cach dechenbar.
  2. 5] Tri hingena in láich nad lac,
    Dóe Caichni ocus Fadat,
    fúaratar dígu ndelba,
    dáig rostréic a tigerna.
  3. Dolluidset co Lind na Tarb
    10] a triur ingen, ba scél ngarb,
    co fuaratar ferdu fer
    fothu féin, fota in t-ainmed.
  4. Imsói Fadat, fota in col,
    co Ath Fadat dia bádud;
    15] luidis Dóe, trúag in t-shét,
    co Lind Dóe dia lán-éc.
  5. Caichni, rosícc Sinchell slán
    co himthend co henech-nár;
    ar a hícc ba hé in fíach,
    20] in chlúain ba lé ó Luirgniuch Líath.

    6. p.158