Corpus of Electronic Texts Edition

The Metrical Dindshenchas (Author: Unknown)

poem 5

Nás

1. Rúadri mac Aitte na n-ell
   nírbo thruag-lí traite thall,
   cliamain Loga, línib long,
   co ngliad-gail glond, gona Gall.
2. 5] Dí ingin Rúadrach in ríg
   Bretan na mbríg mbúadach mbán
   dí mnái Loga, roslúi ás,
   Búi in broga ocus Nás nár.
3. Nás máthair Ibic na n-ech
   10] dligid a drech is a dath,
   ó thesta co ngaile grith,
   cía festa ar bith baile atbath?
4. Nás rogaibi gním cen gáis;
   (fír cen báis) rosbáidi bás,
   15] co nglúairi im gairg-dliged grés
   's úadi rohainmniged Nás.
5. Nás Lagen co nglan-gart glan,
   is and rohadnacht in ben,
   di ráiter fri derbthas ndein,
   20] ní cheil sein senchas na sen.

---

p.50

6. A siur i Cnogba cen chlói
   iar lot a comga 's a crúi:
   nirbu mall marb-alt don mnái,
   is and bái 's roadnacht Búi.
7. 25] Cnogba cnoc Búa na mbág;
   nísbrúa sár snomda slúag;
   acht iss í im garg-mathim ngním
   is ard-chathir na ríg rúad.
8. Tancatar slúaig Gáidel nglan
   30] do cháined na mban don brug;
   ó Thaltin i tocab tein,
   assin dollotar la Lug.
9. Láiset gáir cáine cach than
   na mban cen chláine cen chol;
   35] roacht leo a cluche cned
   i muche, nirbu mer mod.
10. Máidiud is assin roás:
    ní hé in fáidiud fás fri fés:
    óenach Talten, talci gleós,
    40] la cach n-antem beós din bés.
11. Ba bed násad Loga láin
    sásad sona, sáim nach súail,
    fáidiud find-gel fúamnach Fáil,
    cáiniud ingen Rúadrach rúaid. R.

---

p.52

12. 45] Tri maic Dorchlaim, tromm testan,
    Nás Boncc ocus Ailestar,
    siar cen chairdiu ós Chúan chestach,
    Tailtiu búan rosbáigestar.
13. Ráth i nUltaib, cían in cháin;
    ráth cóicid Chonnacht co mbúaid;
    ráth cóicid Lagen cen tláis;
    magen do Náis ingin Rúaid. R.⁴

---

p.54