Corpus of Electronic Texts Edition

The Metrical Dindshenchas (Author: Unknown)

poem 16

Almu I

1. Almu Lagen, les na Fían,
   port ragnathaig Find fir-fhial,
   dorala sund a slicht sain
   inní d'atá Almu ar Almain.
2. 5] Almu ainm ind fhir rosgab
   re lind Nemid na nert-blad;
   marb thall sin tilaig úane,
   do thám opund oen-uaire.
3. Almu rop alaind in ben
   10] ben Nuadat móir mic Aiched
   rachunig, ba fír in dál,
   a ainm ar in cnocc comlán.
4. Nuada drúi ba duni garg;
   darónad leis dún dronard;
   15] racomled leis almu i n-aill
   don dún ule ar n-a thoraind.
5. Oen-gel in dún, dremne drend,
   mar nogabad áel h-Erend;
   dond alamain tuc d'a thaig,
   20] is de atá Almu ar Almain.
6. Tadc mac Nuadat, nertaid gail,
   drúi Cathair Moir cu mór-blaid,
   dó rafhacaib a athair
   Almuin cona h-ard-rathaib.
7. 25] Ingen gnoach oc Tadg thrén,
   darab ainm Murni mun-cháem;
   rocunged o Chumull in ben;
   rosérastar Tadc taeb-gel.

---

p.74

8. Rasuc Cumull ar écin,
   30] ingin Taidc, cer gním étig;
   bliadain can chert is can chlód
   do Murni ic Cumull chath-mór.
9. Cíís Tadc cu trén-athach
   re Cond calma cét-chathach,
   35] ronimderg, adbul in t-olc,
   ronglám, ba mór in mudocht.
10. Focairther o Chund chalma
    do Chumull facbáil Banba;
    corchurset cath Cnucha thall,
    40] co torchair re Cond Cumall.
11. Nói tráth re cur in chatha
    darónad fer in ratha
    re hingin Taidc in táeib-gil,
    darronad Find fír-fhennid.
12. 45] Luid Murni ar marbad a fir,
    cu ránic Almain n-oen-gil;
    ba caintech cumthach rabáei;
    nirbo dethbir don deg-mnái.
13. Alaind bái in rígan cu rath,
    50] ocus si tháeb-lán torrach;
    rafhocair Tadc, mór in mod,
    a marbad am-mudugod.
14. Roraid Cond co nhgili glacc:
    "Ba ferr lim co m-béra macc,
    55] inund máthair cor-rathaib
    do Chumall is do m'athair."
15. Diultaider ic Taidc co trén;
    do Murni ba domna dér;
    ar nírlam a labrad,
    60] am-milliud, nó am-moch-marbad.

---

p.76

16. Dolluid co Temair find Fail
    Murni muin-chaím cnis
    [gap: extent: 2 syllables]
    
    coroiarfaig do Chund can chol
    a h-imthús a h-ordugod.
17. 65] "Imthig-siu," ar Cond, "is ced lind
    co Fiacail Fí mac Conchind
    der-fiur Cumaill tall istaig
    Bodmall B
    [gap: extent: 5 syllables]
    ".
18. Dolluid co Temraig Margi
    70] Murni mun-chaim cu n-ardi;
    Conla gilla Chuind can chol
    ca
    [gap: extent: 2 syllables]
    d'a ordugod.
19. Ba faelid ria in gilla grind
    in Fiacail Bi mac Conchind,
    75] ba fálid Bodmall cu becht,
    ba faelid uile in t-airecht.
20. Arsain rucad Find febda
    rí na Fian, mór a menma;
    nói mhbliadna fichet mod tend,
    80] rop é rig-fhénnid h-Erend.
21. Cungis Find ar Tadc na tor
    íc Cumull móir do marbod
    cath can chardi dó, can dáil,
    nó comrac oen-fhir d'fhagbáil.
22. 85] Tadc uair nir thualaing catha
    i n-agaid ind fhir-fhlatha,
    rofhacaib leis, ba lór dó,
    mar robái uile Almó.

A.

---

p.78