Corpus of Electronic Texts Edition

The Metrical Dindshenchas (Author: Unknown)

poem 8

Lagin I

1. Rohort in rigrad 'moa ríg,
   (ba gním olc, ba domna h-ír);
   loisc Loingsech Móen, méit gaile
   Cobthach Cóel mac Ugaine.
2. 5] Ba Túaim Tenbath cosin olc
   in ríg-dind rán, in rochnocc,
   cornoirg Labraid, lán n-gaile,
   diarchuir ár a maccraide.
3. O rohoirged, is é a fhír,
   10] Cobthach cóel, a thrichait ríg,
   corgénair mac mór Maire
   cóic cét bliadna bith-glaine.
4. Ba tossach glíad is gaile
   pían Chobthaig for Lóegaire;
   15] de dorochair Cobthach Cairn
   la h-úa Lóegaire lond-gairb.
5. Luidset dond orgain for sét
   Labraid, Dubgaill trichat cét,
   'na congaib ágmair assaid,
   20] cona lágnib lán-glassaib.
6. O na laignib-sin ille
   rogairit Lagin Laigne:
   la Loingsech Móen, co méit olc,
   Cobthach Cóel ba díb rohort.
7. 25] Meraid 'ca chlaind co tí bráth,
   corob cocad ríg rognáth:
   Oilill Lóegaire do lot
   la Cobthach Cóel cétna h-ort.

---

p.52