Corpus of Electronic Texts Edition
The Irish Charters in the Book of Kells (Author: [unknown])
section 4
IV.
Do saire cille delga inso.
Fechtastánic Conchobor ua maelshechlaind do síthradaui aeda .i. riagilla coloim [...] coaltan cenandsa co tarat comarba colaim cille (.i. maelmoire uauchtan) co na samud & co na minnaib [...]
p.138
nocht chommairche friu, & conasragaib for a muin do altoir coluim cille & conasruc leis co les luigdech & co ros dall is in glind ri dún meic cennán a ndes. Conid i cinaid in tsháraigthe sein do rat conchobor ua maelsechlaind cill delga co na crích & co na ferund do dia & do colum cille co brath cen cis cen chobach cen fecht cen luaged cen choinnim ríg na toisig fuirri mar [...] ba raeimi, ar ni laimed taisech a tadall etir céin ro bai i crich. Ocus a teat so inna commairche & inna slána do rata and .i. amalgaid comarba patraic co mbachaill ísu & comarba finnén & comarba ciarán cona minnaib ó cleirchib, ri imorra telcha airdd .i. oengus ua cainelbain, & ri telcha cail .i. maelisu mac coirthen, & ri maige lacha .i. gilla griguir ua dummaige, & ri tuath luigne .i. laidgnen mac maelan, o laecaib, & mor ingen meic conchobair ind rígan cen nach nathcor na commairce sen co brath. I fiadnaise fer mide eter laechu & cleirchiu do rata na slana sein & na commairche, & tucsat uile eter laechu & cleirchiu a mbennachtain do cach rig na
p.140
tairgad dar in saire sein co brath, & tucsat uile a mallachtain do cach rig do roised tairis sein. & gid guasacht do cach rí sarugud coluim cille is guasachtucha do rig & gid guasacht do cách rig is guasachtucha do rig temrach, uair is brathair hé do colum cille.