Corpus of Electronic Texts Edition
The Irish Charters in the Book of Kells (Author: [unknown])

section 3

III.

Ferand do rúagell saccart cenandsa cona braethrib .i. oa breslen cona braithrib .i. isse inso in ferand .i. achad muine choscain cossin nachod mór ar a bélaib ocus cona lenu ocus cona mónaí .i. corrice in lathaig riss anes ocus cossin choélachod ris anair ocus cos sid aithlius ris anair co na lanntaib ocus frith lanntaib ocus co na aithche .i. cossin lathaig domnaig móir. Ocus is sé so in lóg, .i. xuiii. nungai co fuilledaib ailib .i. co fichet ungai iar dóthucht. Ocus ó ua riamán dergled, .i. a ferand díles fein. Ocus iteat so sís inna commairge & ina dílse do ratai and. Oengus mac mic rancáin lántoísech síl tuathail & coile follomain, ocus gilla odor mac mic ruadacháin ocus cudub mac


p.134

mic comgain .i. o claínd ruadrach sen, ocus cuduilig óa sneain co na braithrib ó claind murchada sen, ocus oa gormán ó claind conaill, ocus tri micmeic cernaig, ocus da mac meic sherraig, ocus mac ui dubthaig doclaind chongalaig inna ndílsi foraib fen & for huíb riaman cossnaib uilib commairgib se reót ocus idiaid foraib fen .i. for claind chongalaig [...] ocus erchennech grellege & secnap & a bachall reódaide & erchennech cille scire & bachall scíre, & conall mac duib ocus iarnán .i. o shordus ule sen, ocus combarba coluim cille, .i. ferdomnach oa clucáin co samud coluim cille ule, ocus oengus oa domnallán in tanmcara

p.136

.i. commarba in dissert coluim cille, ocus ind epscop óa dúnán .i. senoir leithe cuind, ocus rí temrach .i. domnall mac flaind huí maelshechnaill, ocus coss in cethor comothec ass in cetharaird .i. gilla beccán mac cillai shechnaill, oa oedan airchennech grencha, ocus ossin mac ectghail aistíre cennansa, ocus mac duibdaman airchennech ratha beccán, ocus óa fiachrach airchennech domnaig móir. Ocus is amlaid rogabta inna commairge se uile iar duidecht i timcell ind eraind do lár ind erainnd. Ocus bennacht de fors naib commairgib se uile nára trécet a commairge, ocus ní raib enech na comairce ó dia occu dia trécet. & issamlaid atá in ferannsa acht ni rodlecht nach císs de ria luaig & ní dlegar iar na luaigh.